Jyl basynan beri elimizde ınternet-alaıaqtyqqa qatysty 17,5 myń qylmys tirkelgen. Bul týraly Ishki ister mınıstrliginen málim etti, dep habarlaıdy Egemen.kz.
«Sońǵy ýaqytta kıberqylmys, sonyń ishinde ınternet paıdalanýshylarǵa qarsy alaıaqtyq jaǵdaılary jıilep ketti. Jyl basynan beri 17,5 myń qylmys tirkeldi, bul ótken jylmen salystyrǵanda 1,7 paıyzǵa tómen kórsetkish. Alaıaqtardyń áreketinen azamattar jyl basynan beri 15 mlrd teńge kóleminde shyǵynǵa ushyrady», dedi Kıberqylmyspen kúres ortalyǵynyń orynbasary Rústem Dıýsetaev.
Spıker atap ótkendeı, onlaın-saýda áli de eń keń taralǵan ádis bolyp otyr. Alty aıdyń ishinde osylaısha 6 myńǵa jýyq alaıaqtyq jasalǵan.
«Bankterde jáne mıkrokredıttik uıymdarda jalǵan onlaın-nesıelerdi tirkeýdiń 2,8 myń faktisi tirkeldi. Fıshıngtik siltemelerdi jiberý arqyly azamattardyń shottarynan 1200 urlyq jasaldy», dedi R. Dıýsetaev.
Sondaı-aq ol bank qyzmetkerleri men quqyq qorǵaý organdarynyń atynan túsken jalǵan qońyraýlar erekshe alańdaýshylyq týǵyzatynyn túsindirdi. Jyl basynan beri osy ádispen 3 myńnan astam alaıaqtyq jasalǵan.
«Mundaı jaǵdaılarda alaıaqtar abonenttik nómirdi ózgertý úshin arnaıy qyzmetterdi belsendi paıdalanady. Iаǵnı, ornatylǵan baǵdarlamanyń kómegimen bastapqy abonenttik nómir basqaǵa aýystyrylady. Áleýmettik ınjınırıng ádisterin qoldana otyryp, alaıaqtar shottaǵy kúdikti operasııalar nemese nesıe alý áreketi týraly habarlaıdy jáne josyqsyz bank qyzmetkerlerin ustaý boıynsha júrgizilip jatqan arnaıy operasııa týraly habarlaıdy», dedi Ortalyq basshysynyń orynbasary.
Onyń aıtýynsha, aqshanyń saqtalýyn qamtamasyz etý úshin azamattardy shottan nemese depozıtten «saqtandyrý» dep atalatyn seıftik shotqa aqsha aýdarýǵa kóndiredi. Keıin urlanǵan aqshany odan ári aýdarý nemese qolma-qol aqshaǵa aınaldyrý úshin paıdalanady.