Almaty úshin jer silkinisterin dál boljaý jáne olar týraly erte habarlaý óte mańyzdy. Bul týraly Prezıdent Almaty jurtshylyǵymen kezdesýinde aıtty, dep jazady Egemen.kz.
«2025 jylǵa qaraı 28 seısmostansııany ornatýdy, sodan keıin olardy Qyrǵyzstannyń erte habarlaý júıesimen biriktirýdi tapsyramyn. Sonymen qatar, qalada tótenshe jaǵdaılar týraly sóıleý habarlamalaryn berý múmkindigimen yqpaldastyrylǵan habarlaý júıeleriniń jumysyn jolǵa qoıý kerek. Bul jumysta úlken derekterdi paıdalaný kerek», dedi Qasym-Jomart Kemeluly.
Ol úshin ákimdik ahýaldyq ortalyqtyń qyzmetin tolyqqandy iske qosýy qajet. Ol beınebaqylaý júıeleriniń, jol trafıginiń, qońyraý belsendiliginiń, áleýmettik ınfraqurylymnyń derekterin jınaqtaıdy.
Prezıdent qalanyń «sıfrlyq egizin» qurý ıdeıasy Aqparattyq tehnologııalar salasyndaǵy zamanaýı úrdisterge jáne úzdik halyqaralyq tájirıbelerge jaýap beretinin atap ótti.
«Qyrkúıek aıyndaǵy Joldaýymda men ár qala boıynsha jer ýchaskeleriniń fýnksıonaldyq ınteraktıvti kartalaryn jáne kommýnaldyq jelilerdiń shemalaryn jasaýdy tapsyrdym. Almatyda bul tapsyrma "sıfrlyq dýbldi" damytý jáne qalanyń Bas josparyn túzetý aıasynda júzege asyrylýda. Bul jobalar bir-birimen baılanysta júzege asyrylatyn júıelik tásildiń jaqsy mysaly. Bul, tutastaı alǵanda, meniń jaqyn bolashaqtaǵy qalany damytýdyń negizgi basymdyqtary týraly kózqarasym», dedi Qasym-Jomart Toqaev.
Prezıdent atap ótkendeı, búginde kórsetilgen barlyq tapsyrmalar men jobalar, eń aldymen, almatylyqtardyń ómir súrý sapasyn jaqsartýǵa, ekonomıkalyq áleýetti kúsheıtýge jáne qalanyń tartymdylyǵyn arttyrýǵa baǵyttalǵan.
Memleket basshysy bul mindetterdi iske asyrý óziniń erekshe baqylaýynda bolatynyn aıtty.