Búgin Prezıdent Qasym-Jomart Toqaev Almaty jurtshylyǵymen ótken jıynda berekeli qoǵam men myqty memleket qurýdyń basty talabyn aıtty, dep habarlaıdy Egemen.kz.
Memleket basshysynyń aıtýynsha, Qazaqstan - ishki jáne syrtqy saıasatta jáne barlyq salada ádildik qaǵıdatyn berik ustanatyn memleket.
«Bizdiń ulttyq ereksheligimizdiń basty sımvoldary – kók baıraǵymyz, tólqujatymyz jáne memlekettik tilimiz. О́zge elder Qazaqstan azamatyn, eń aldymen, osy qundylyqtar arqyly tanyp biledi. Berekeli qoǵam jáne myqty memleket qurýdyń taǵy bir mańyzdy sharty bul – áleýmettik ádildik. Onsyz eshbir sala damymaıdy. Ádiletsiz shyǵarylǵan sheshim qoǵamǵa iritki salyp, jurttyń narazylyǵyn týdyrady. Sondyqtan eshqashan ádildikten attaýǵa bolmaıdy. Biz ishki jáne syrtqy saıasatta, jalpy, barlyq salada osy ustanymdy saqtaımyz. О́ıtkeni bul – turaqtylyqtyń, tatýlyq pen tynyshtyqtyń basty kepili. Ádildik bar jerde zań saqtalady, tártip buzylmaıdy. Biz osy qaǵıdattardy basshylyqqa ala otyryp, jańa qoǵam quramyz. Osy oraıda, el aǵalarynyń jastarǵa durys baǵyt-baǵdar berýi asa mańyzdy. Basty qundylyqtarymyzdy óskeleń urpaqqa baıyppen túsindirip, sanasyna sińirý – bárimizge ortaq paryz. Osynda otyrǵan azamattar, sizder de osy jumysqa mol úles qosasyzdar dep senemin», dedi Prezıdent kezdesý barysynda.
Sózin qorytyndylaı kele, Memleket basshysy prezıdenttik qyzmettiń negizgi rólin atady.
«Meniń túsinigimde, Prezıdent – jaldamaly menedjer, halyq onymen belgili bir merzimge kelisimshart jasaıdy. Azamattardyń erkin tańdaýynyń nátıjesinde eldegi eń joǵary memlekettik laýazymǵa ıe bolǵan adam mıllıondaǵan otandastarynyń daýysymen bekitilgen kelisimshartqa qol qoıady. Sondyqtan Prezıdenttiń laýazymy – artyqshylyqtan buryn zor jaýapkershilik. Bul qyzmetti atqarǵan jáne atqaratyn árbir adam eń qatal úsh sottyń – halyqtyń, tarıhtyń jáne óz ar-ujdanynyń aldynda jaýap beredi. Senim – eldiń ıgiligi men damýyna, halyqtyń yntymaǵyna negiz bolatyn qasterli uǵym», dep atap ótti Qasym-Jomart Toqaev.