Bıyl Almaty oblysynda densaýlyq saqtaý salasynyń materıaldyq-tehnıkalyq bazasyn nyǵaıtýǵa 4,4 mlrd teńgeden astam qarjy bólindi. Osy qoldaýdyń nátıjesinde medısına mekemeleriniń jabdyqtalýy 91 paıyzǵa jetip otyr. Al jaqynda óńirdiń jedel járdem qyzmetine jańa kólikter berildi.
Qonaev qalalyq aýrýhanasynyń aýmaǵynda medısına qyzmetkerlerine 35 jańa avtokóliktiń kiltin tapsyrý rásimi ótti. Is-sharaǵa Almaty oblysynyń ákimi Marat Sultanǵazıev qatysty. Quttyqtaý sózinde ol óńirde medısına salasyna kóp kóńil bólinetinin atap ótti.
– Ýaqtyly shuǵyl kómek kórsetý úshin brıgadalardy kóbeıtip, sanıtarlyq kólikti jańartyp jatyrmyz. Oblysqa lızıng boıynsha 35 mashına bólindi, onyń jeteýi Qonaev qalasyna tıesili. Bul dárigerlerdiń jumys isteýin birshama jeńildetedi. О́ıtkeni jańa «jedel járdem» kóligi zamanaýı tehnıkamen jabdyqtalǵan, – dedi M.Sultanǵazıev.
Jalpy, jergilikti bıýdjet esebinen Hyundai H-350 jáne JAC Sunray markaly sanıtarlyq kóliktiń 35 birligi satyp alynǵan eken. Almaty oblysy Densaýlyq saqtaý basqarmasynyń basshysy О́mirzaq Nııazbekovtiń aıtýynsha, barlyq avtokólik qajetti jabdyqtarmen jabdyqtalǵan. Bul sapaly jáne shuǵyl kómek kórsetýge múmkindik beredi.
– Jedel jáne shuǵyl medısınalyq kómekti 142 brıgada kórsetedi. Sanıtarlyq avtokólik parkin tolyqtyrý esebinen jedel jáne shuǵyl medısınalyq kómek brıgadalarynyń sanyn 8-ge ulǵaıtý jáne aýyldyq eldi mekenderdiń medısınalyq uıymdarynyń alystyǵyn eskere otyryp, olardyń sanyn 150-ge deıin jetkizý josparlandy. Bul avtoparkti jańartýǵa jáne tolyqtyrýǵa múmkindik beredi. Munyń bári oblys halqy úshin jedel jáne shuǵyl medısınalyq kómekti ýaqtyly kórsetýge múmkindik beredi, – dedi О́.Nııazbekov.
Al jańadan berilgen «Jedel járdem» kólikteri Jambyl, Balqash, Kegen, Raıymbek, Uıǵyr, Talǵar, Qarasaı aýdandarynyń, sondaı-aq Boraldaı men Qonaev qalalarynan túsetin shaqyrtýlarǵa qyzmet kórsetýge bólindi.
Almaty oblysy