Karateden Álem jáne Eýropa chempıony, Qazaqstannyń eńbek sińirgen jattyqtyrýshysy, Aqtóbe qalasynyń jáne Alǵa aýdanynyń qurmetti azamaty Áshim Qalı otbasymen Aqtóbe qalasyndaǵy Indýstrıaldy kolledj ǵımaratynda ornalasqan №39 saılaý ýchaskesine kelip daýys berdi, dep habarlaıdy Egemen.kz.
- Jekpe-jek túrleri boıynsha Reseı Federasııasy Orel qalasynda ótken Álem chempıonatynan oralǵan boıym. Úıge kelip, birden otbasymdy ertip prezıdent saılaýyna keldim. Saılaýǵa qatysyp, óz daýysymdy berý – azamattyq boryshym. Osy saılaýdan halqymyz úlken úmit kútedi. Men Ádiletti Qazaqstandy qurýǵa árbir azamat úles qosýy kerek dep esepteımin. Árbirimiz óz salamyzda adal ári shyn nıetimizben jumys istesek, qoǵamdy jaqsy jaǵyna qaraı ózgerte alamyz.Meniń jasym 60-ta. Sporttyń jaýyngerlik túrleri boıynsha balalardy jattyqtyramyn. Orel qalasyndaǵy chempıonattan birneshe jas sportshy júldemen oraldyq. Soǵan qatty qýanyshtymyn. Biz Otanyn súıetin patrıot jastardy tárbıeleýimiz kerek. Aqtóbedegi Jaýyngerlik kúres túrleri federasııasynda jastarymyz sporttyń 26 túri boıynsha jattyǵady. Jalpy elińniń qadirin syrtqa barǵanda sezesiń, - deıdi Áshim Qalı.
Indýstrıaldy kolledjdiń ǵımaratynda ornalasqan №39 saılaý ýchaskesi tańǵy saǵat 7.00-de ashylǵan. Erteńgilik eki saǵat ishinde 100-ge jýyq saılaýshy kelip daýys berdi.
- Kóbinese orta jastaǵylar belsendilik tanytyp jatyr. Jalpy osy ýchaskede 1871 saılaýshy tirkelgen, - deıdi №39 saılaý ýchaskesiniń tóraǵasy Aqaltyn Mashan.
Aıta keteıik, Aqtóbe oblysynan 560 myń 819 saılaýshy 517 saılaý ýchaskesinde daýys beredi. Búgingi kúni 3 myń 477 adam ýchaskelik saılaý komıssııalarynda jumys istep jatyr.