Túrkistan oblysynda saılaý kúni 90 náreste dúnıe esigin ashty. Atap aıtsaq, 46 er bala, 44 qyz, onyń ishinde 2 egiz dúnıege keldi, dep habarlaıdy Egemen.kz.
Túrkistan óńiri turǵyndarynyń saıası naýqanǵa degen belsendiligi joǵary boldy. Oblys boıynsha 919 saılaý ýchaskesi bar. Onyń 50-i oblys ortalyǵynda ornalasqan. Saılaý ýchaskeleriniń 893-i azamattardyń turǵylyqty jeri boıynsha jáne 26-sy ýaqytsha bolý oryndaryndaǵy saılaý ýchaskesi. Tań sáriden kelip tańdaý jasaǵandardyń arasynda jastar da, qarııalar da az emes. Mysaly, Saıram aýdanynda eń belsendi daýys berýshilerdiń biri 100 jastaǵy Sadyq Qýatbekov aqsaqal №560 saılaý ýchaskesine nemerelerin erte kelipti.
«Elimniń bolashaǵyna beıjaı qaraı almaımyn. Sondyqtan árbir saılaýdan qalmaı daýys berip kelemin. Prezıdentti tańdaý jarqyn bolashaqty tańdaý dep bilemin», deıdi ǵasyr jasaǵan qarııa.
Jalpy aýdan boıynsha 133 065 daýys berýshi bar. Olardyń basym bóligi túske deıin óz tańdaýyn jasap úlgerdi.
Sondaı-aq Kentaý qalasynda 96 jastaǵy Ekinshi dúnıejúzilik soǵystyń ardageri Badan Tórebaev saılaý ýchaskesine tań sáriden kelgen. Qarııanyń belsendiligi kópshilikti tánti etti. Aqsaqal daýys bergen soń, Alladan eldiń amandyǵyn tilep, bata berdi.
Oblys ákimi Darhan Satybaldy Túrkistan qalasyndaǵy №133 saılaý ýchaskesine kelip daýys berdi. Túrkistan qalasynda 5 saılaý ýchaskesinde daýys berý kúni tirkeýde joq azamattardy anyqtaý jáne tirkeý boıynsha qyzmetter uıymdastyrylǵan.
Aıta ketelik, saılaý kúni oblys boıynsha 90 náreste dúnıe esigin ashty. Oblystyq qoǵamdyq densaýlyq basqarmasynyń habarlaýynsha, 46 er bala, 44 qyz, onyń ishinde 2 egiz dúnıege keldi. Egizderdiń biri – Qazyǵurt aýdanynda, ekinshisi Túlkibas aýdanynda týǵan. Dárigerlerdiń habarlaýynsha, analar men sábılerdiń densaýlyǵy jaqsy.
Túrkistan oblysy