Oblystaǵy Maı aýdany kezinde Semeı polıgony zardabyn kórdi. Áli syzy kete qoıǵan joq. Ánshi Baıǵabyl Jylqybaev, ártis Shahan Mýsın, ǵalymdar Meıirhan, Jabaıhan Ábdildınder týǵan jer. Aýyl-aýyldary án men kúıdiń ortasy, aqyn-jazýshy, jyrshylary az emes. Syryn búgip, Qalmaq qyrylǵan, Aqshıman taýly-dala qupııasy jatyr. Malaısary aýylynda kil kókparshy jigitter turady. Osy aýyldarda turatyn orys-nemisińniń ózi qazaqshadan jańyldyrady. Al aýdandyq «Shamshyraq» gazetiniń 70 jyldyq tarıhy bar. Ákimdik kóńil aýdara qoımaǵan ba, qazaq gazetiniń ǵumyrly tarıhy byltyr ataýsyz qaldy. Tipti, redaksııanyń turaqty ǵımaraty da joq, anda-mynda kóship qonyp júredi. Qazir aýdan ortalyǵyndaǵy mádenıet úıiniń bir bólmesine kelip, pana taýypty. Jolsaparǵa barǵanda áriptesterimizdiń «kóshpeli redaksııalaryn» kórgenbiz. Apatty jaǵdaıda turǵan ǵımaratta eriksiz «zańsyz» túrde jumys jasaıdy. Oblystyq ishki saıasat basqarmasy, aýdandyq gazetterdiń jaǵdaıyn jaqsartamyz degen aty dúrkiregen «Ertis» holdıngi, aýdan basshylyǵy «Shamshyraq» gazetiniń jabylýǵa shaq qalǵanyn, redaksııaǵa ǵımarat, tehnıkalyq quraldar, kólik qajet ekenin bilmeı me? Kórip-bile otyra, aýdandyq gazettiń taǵdyryna beı-jaı qarap otyr. Redaksııada jumys jasaıtyn aınaldyrǵan úsh-tórt adam. Eki tilshi bar. Tilshi jigit Meırambek Qyzyr baýyrymyzdyń aıtýynsha, «Shamshyraqtyń» basynda qandaı qıyndyq bolsa da, redaksııa júkterin kóterip kóship-qonyp júrse de gazet shyqpaı qalǵan birde-bir kún bolmapty. Joǵaryda aty atalǵan jergilikti bılik oryndaryna bul syn, uıat. Aýdan ákimi Ashat Jarmaǵanbetov aýdanǵa kelgen kúni-aq, aýdan ákimdiginiń tynys-tirshiligin jazatyn gazet ujymyna jaǵdaı jasaýy kerek edi. О́zge tilde bilim alǵan, ózge tilde sóıleıtin Baýyrjan Qapenov, Rýslan Bılıalovtar aýdandyq gazetke qamqorlyq jasaǵandary memlekettik til – mártebeli ana tilimizdi qurmettegenimiz ekenin áli túsinbeı júr me sonda?..
Farıda BYQAI,
«Egemen Qazaqstan».
Pavlodar oblysy,
Maı aýdany.