О́nerdiń asyly qashanda qunyn joımaıdy. Bul, ásirese, syrǵa baı beıneleý ónerinde kóptep kezdesedi. Ondaǵy san qyrly syrdy ishine búkken maıly boıaý kartınalary ózindik qupııalarymen kórermendi baýrap alyp, qansha ret qadala qarasa da kózi toımaıdy. Osyndaı shyǵarma avtorlarynyń biri halyq sýretshisi Sahı Romanov desek, jýyrda ataqty óner ıesiniń týyndylarynan turatyn kórme elordadaǵy Oqýshylar saraıynda óz jalǵasyn tapty. Atalǵan sharaǵa, ǵalymdar, sýretshiler, ólketanýshylar men jalpy óner-súıer jurtshylyq qatysty.
Qaraǵandy oblysy, Aqtoǵaı aýdanynyń perzenti Sahı Romanovtyń qylqalamynan týǵan tyrnaqaldy týyndysy «Jaılaýdaǵy kesh» polotnosy eken. Munda avtor boıaýlardyń úndestik úılesimin sheber beınelegen. Keshki mezgildegi shopan qyzdyń qoıdy taý eteginen túsirip, aýylǵa aıdap kele jatqany eńbek ıesi keskinindegi eńbek rahatynyń tabyn kórsetkendeı. Sýretshiniń bul shyǵarmasy áýeli sol jyly «Ogonek» jýrnalynda jarııalanady. Sondaı-aq, qylqalam ıesiniń abyroı-ataǵyn kótergen «Qyryq ótirik», «Qurmanǵazy», «Jer týraly dekret», «Kisen ashqan», «Otan aıasynda» kórkem týyndylary kópshilikke keńinen tanymal.
Jalpy, Sahı Romanov kıno salasyna da eńbek sińirgen jan. Onyń «Án qanaty», «Qanatty syılyq», «Aldar kóse», «Daladaǵy qýǵyn» fılmderine dekorasııalyq sýretter salǵany sózimizdiń dáleli.
«Astanada ótkizilip jatqan kórnekti sýretshi, óner qaıratkeri Sahı Romanovtyń kórmesiniń elordanyń zııalylary men jas urpaqtary úshin mańyzy erekshe. О́ıtkeni, sýretshiniń esimi elimizde ǵana emes, burynǵy Keńes Odaǵynda, shetelde belgili bolǵan. S.Romanov qazaq qylqalam óneriniń, sonyń ishinde keskindeme, portret óneriniń ozyq sheberi. Onyń shyǵarmalarynan biz árdaıym qazaq dalasy men turmys saltynyń, ulttyq ereksheliginiń beınesin kóremiz. О́ner ıesiniń shyǵarmashylyǵy óz zamanynda óte keń taraldy. Desek te, Táýelsizdiktiń 23 jylynda onyń murasyna qaıta bir qaraý óte mańyzdy. Bul sýretterdiń deni elde saqtalyp qalǵan, muraǵat qoımalarynda áli kúnge deıin halyqqa kóp nasıhattalmaǵan týyndylar. Sondyqtan da, olardy Sahı Romanovtyń eńbekteriniń jarııalanbaǵan jańa beti, tanystyrylǵan paraqtary deýge de bolady», – dedi kórmede sóz alǵan fılologııa ǵylymdarynyń doktory Dıhan Qamzabekuly. Sonymen qatar, ol sharany uıymdastyrýǵa belsendilik tanytqan azamattarǵa da sheksiz alǵysyn jetkizdi. Al sýretshiniń muralaryn tirnektep jınaýda baryn salyp júrgen Aqtoǵaı arheologııalyq etnografııalyq murajaıynyń dırektory, ólketanýshy Tuńǵyshbaı Muqanov avtor jaıynda mol maǵlumattardan syr shertti.
Kórmeden oıyp turyp oryn alǵan «Maıanyń sýreti», «Buǵaýdan bosaý», «Aqynnyń sýreti», «Qaıran sheshem», «Jaılaýdaǵy kesh», «Áje» týyndylary kórermenniń kózaıymyna aınalyp, jurtshylyqty tamsantty.
Ábdirahman QYDYRBEK,
«Egemen Qazaqstan».
Sýretterde: S.Romanov. «Qurmanǵazy», «Qaıran sheshem».
Sýretterdi túsirgen Erlan OMAROV.