Jyl basynda ákimder halyq aldynda esep beredi ǵoı. Sol kezde ótken jyly jasalǵan jumyspen qatar, bolashaqta atqarylatyn tolymdy is týraly da bilip jatamyz. Sondaı jıynda aımaq basshysy Qyrymbek Kósherbaev bıyl Qyzylorda qalasynda jańa teatr salynatynyn aıtqan. Mine, jaqynda jańa mádenıet oshaǵynyń eskızdik jobasy sáýlet-qala qurylysy keńesinde talqylandy.
Teatr Jeltoqsan jáne Qorqyt ata kósheleriniń qıylysynda boı kóteredi dep kútilýde. Jalpy aýmaǵy 2,2 gektar jerdi quraıdy. Ǵımarattyń eni – 48, al, uzyndyǵy 90 metr bolmaq. Syrtqy kelbetine klassıkalyq, shyǵys jáne qazaq sáýlet óneriniń úlgileri men elementteri keńinen qoldanylmaq. Teatr 3 qabattan turady. Birinshi qabat sharýashylyq-tehnıkalyq bólmelerinen tursa, ekinshi qabatta holl, vestıbıýl, kıim iletin oryndar, ákimshilik bólmeler, býfet, 400 orynǵa arnalǵan kórermen zaly jáne taǵy basqa da qosalqy jaılar ornalasady. Úshinshi qabatta 200 adamǵa arnalǵan kórermen zaly qyzmet etpek.
Teatr aýmaǵynda 200 avtokólikke arnalǵan avtoturaq salý kózdelýde. Teatrdyń qas betine shaǵyn sáýlettik formalardy ornalastyrý josparlanýda.
Buǵan qosa, A.Toqmaǵambetov atyndaǵy teatrdyń ǵımaraty da qaıta jańǵyrtylady dep kútilýde.
Erjan BAITILES,
«Egemen Qazaqstan».
QYZYLORDA.