Taýqymet pen taǵzym

Tuńǵysh ret saıası qýǵyn-súrgin qurbandaryna arnalǵan beınetaspalar jınaǵy jaryq kórdi Osy aptada Almatydaǵy Qazaq memlekettik qyzdar peda­gogı­kalyq ýnıversıteti jáne «Jeruıyq» qoǵamdyq birlestiginiń uıymdastyrýymen «Taýqymet pen taǵzym» atty jıyn ótip, oqıǵa barysynda «Taýqymet pen taǵzym» atty beınetaspalar jınaǵynyń tusaýy kesildi. Tanystyrylym barysynda «Jeruıyq» qoǵamdyq birlestiginiń tóraǵasy Bolatbek Tólepbergen: «Bul 1937-1938 jyldardaǵy saıası qýǵyn-súrgin taqyrybyna arnalǵan CD albom-jınaǵyn jaryqqa shyǵarý tuńǵysh ret júzege asyp otyr. Basty maqsatymyz – saıası qýǵyn-súrgin jáne asharshylyq qurbandaryna arnalǵan shyǵarmalar men kórkem dúnıelerdi nasıhattaý bolyp tabylady», – dedi. Úsh dıskiden turatyn jınaqtyń birinshi dıskisine saıası qýǵyn-súrgin jáne asharshylyq qurbandarynyń ánderi jáne taqyrypqa saı ánder men kúıler, ekinshi dıskige kórkem-sýretti jáne derekti fılmder, al, úshinshi dıskige saıası qýǵyn-súrgin jáne asharshylyq qurbandarynyń fotomálimetteri men shyǵarmalary, estelikteri, taqyrypqa saı muraǵat materıaldary toptastyrylǵan. Keıingi urpaq 1937-38 jyldar – qazaq halqyn ult zııalylarynan aıyr­ǵan aıar jyldar ekenin bilip óssin degen nıetten týǵan bastamany Almaty qalasy Ishki saıasat basqarmasy qoldap, jınaqtyń shyǵýyna tikeleı yqpal etken. Derekterge súıensek, qazaq tarı­hy­nyń zulmatty kezeńi atalǵan repressııa saldarynan 25 myńnan asa qazaqstandyq qazaǵa ushyrady. 103 myń adam saıası aıyp taǵylyp sottalyp, onyń tórtten biri atylǵan. Aınash ESALI, «Egemen Qazaqstan». ALMATY.