Almatydaǵy S.Muqanovtyń mýzeı-úıiniń qorynda jazýshynyń mereıtoılaryna oraı syılanǵan kóptegen kóztartarlyq zattar bar. Solardyń biri – Qazaqstannyń halyq ártisi Ámına О́mirzaqovanyń Sábeńniń 60 jyldyq mereıtoıyna syılaǵan, óz qolymen kestelegen jastyqtyń tysy.
Jastyq tysynyń materıaly – atlas. О́lshemi: 41h32 sm. Ústińgi jaǵy – aq mata. Joǵarǵy bóliginen túrli-tústi jiptermen kestelenip, óleńmen órilip jazylǵan tilekti oqýǵa bolady:
«Abzal aǵa, Sábem!
Jasaı ber abzal aqyn múdirmesten,
Balasy Saryarqanyń qyrynda ósken.
Zor tulǵań ǵasyrlarmen qatar samǵap,
San urpaq shyǵarmasyn jyryńdy
esten!
Ámına. 14.11.1960».
Al tómengi jaǵyna tumsyǵyna quttyqtaý hatty ilip alyp, ushyp bara jatqan taýys qusyn, sonymen qatar ormannyń ádemi janýary – qos buǵy, gúlder beınelengen. Jastyqshanyń astyńǵy jaǵy birkelki jasyl tústi mata.
Sahnadaǵy ǵajaıyp ónerinen bólek, Ámına apanyń on saýsaǵynan óner tamǵan sheber, ismerligi bar bolǵanyn, «Jol taptym bar qazaqtyń júregine» degen jazýshyǵa erekshe qurmetin osy dúnıesinen de baıqaýǵa bolady. «Qazaq atty qasıetti de kıeli halyqtyń qarapaıym qyzy Ámına apaıdyń júrip ótken ómir joly – ulaǵatty da ulyq, oramdy da oraıly nurly jol», dep KSRO-nyń jáne Qazaqstannyń halyq ártisi, Qazaqstannyń Eńbek Eri Asanáli Áshimov az sózben tereń maǵynaly tamasha pikir bildirgen bolatyn.
Nazgúl ALTAEVA,
S.Muqanov pen Ǵ.Músirepovtiń ádebı-memorıaldyq mýzeı kesheni ǵylym bóliminiń jetekshisi
ALMATY