Qarashanyń 3-inde Qaraǵandydaǵy Lenın atyndaǵy shahtadaǵy apatty tergegen Úkimettik komıssııa jumysyn aıaqtady. Komıssııa apatqa jumys berýshi, ıaǵnı «ArselorMıttal Temirtaý» AQ kináli dep anyqtady. Tragedııadaǵy jumysshylardyń kinási – 0 paıyz. Jumys berýshiniń kinási – 100 paıyz. Bul týraly Úkimettik komıssııanyń tóraǵasy, Tótenshe jaǵdaılar mınıstri Iýrıı Ilın málimdedi.
Shahtadaǵy apatqa jaýapty 26 tulǵa anyqtaldy. Olar «ArselorMıttal Temirtaý» AQ basshylyǵynan bastap, Lenın atyndaǵy shahtanyń ınjenerlik-tehnıkalyq quramyna deıingi mamandar. Arasynda ózge memlekettiń azamattary da bar. Atap aıtsaq, Bıdjý Naır jáne Djelson Batısta. Mınıstrdiń aıtýynsha, aldaǵy tergeý barysynda kýá nemese kúdikti retinde ózge de qyzmetkerler, jaýapty tulǵalar belgili bolýy múmkin. Apatty tergeý qujattary qadaǵalaý jáne quqyq qorǵaý organdaryna tapsyrylady.
– Qaıǵyly jaǵdaıdyń oryn alýynyń negizi sebebi – óte úlken kólemdegi metannyń kómir tozańymen birge bólinýi. Jarylys №79 pıket aýdanyndaǵy burǵylaý stanogyndaǵy burǵy shtangasynyń metal tireýge úıkelisinen shyqqan ushqynnan tutanǵan. Sondaı-aq Lenın atyndaǵy shahtada kómir departamentiniń, tikeleı Lenın atyndaǵy shahtanyń ınjenerlik-tehnıkalyq qyzmetkerleri jumysyn durys uıymdastyrmaýy da bir sebep, – dedi mınıstr.
Vedomstvo basshysynyń aıtýynsha, apatqa mamandardyń jetispeýshiligi de yqpal etken. Máselen, komıssııa shahtada qaýipti ýchaskelerge boljaý jasaıtyn qyzmettiń shtaty tolyq emestigin anyqtady. Taý-ken sheberleri az. Zań boıynsha shahtada 25 taý-ken sheberi jumys isteýge tıis. Biraq bul jumysty 13 adam atqarǵan. Mamannyń kemdigi uńǵymany burǵylaýda boljaý qyzmetiniń ınjenerlik baqylaýyn tolyq deńgeıde júrgizýge múmkindik bermegen. Mamannyń azdyǵy sapa men parametrlerdi qadaǵalaýǵa keri áser etken. Budan bólek, shahtada jerasty elektrslesari jetpeıdi. Shahtada mundaı 25 mamannyń ornyna 16 elektrslesar jumys istep kelipti. Al elektrslesardyń mindeti – gaz qorǵanysy eseptegishteriniń qyzmetin baqylaý.
– Uńǵymany burǵylaý shańdy baspaı júzege asyrylǵan. Bul jyldam tutanatyn kómir tozańynyń kóp jınalýyna alyp kelgen. Burǵy stanoktarynyń ornalasýy elektrmen jabdyqtaý jáne uńǵymalardy burǵylaýdaǵy aerogazdy baqylaý qujaty syzbasyna sáıkes kelmegen. Sonymen komıssııa bul tragedııadaǵy jumysshylardyń kinási – 0 paıyz, jumys berýshiniń kinási 100 paıyz ekenin anyqtady, – dedi Iý.Ilın.
Apatqa jol bergen tulǵalardy joǵaryda atap óttik. Al «ArselorMıttal Temirtaý» AQ kásiporyndaryndaǵy mamandardyń jetispeýshiligi búgin ǵana týyndaǵan problema emes.
– Bul problema kómir basseıniniń shahtalaryna da tán. Buǵan deıingi basqa shahtalarda oryn alǵan tótenshe oqıǵalar boıynsha biz turaqty baqylaý jumystaryn júrgizip kelemiz. Bıyl josparlydan bólek, jospardan tys tekseristerdi de júrgizdik. Barlyq usynysty berdik. Odan keıin materıaldardy sotqa joldaımyz, sodan soń sot qural-jabdyqtardyń jumysyn toqtatý týraly sheshim shyǵarady. Bizdiń usynystardy shahta basshylyǵy oryndaýǵa mindetti. Degenmen keıde uzaq ýaqytty talap etetin faktiler bar. Bul, birinshiden, personaldy oqytý, daıarlaý. Alynǵan qural-jabdyqtardy iske qosý úshin de adamdar oqytylyp, daıarlyqtan ótýge tıis. Men «ArselorMıttal Temirtaý» AQ-nyń jumysyn joqqa da shyǵarmaımyn, asyra da baǵalamaımyn. Biz jaǵymdy dınamıkany kórip otyrmyz. Jańa qural-jabdyqty qarjylandyryp, satyp alý artyp keledi. Biraq ókinishke qaraı, alynǵan quraldardyń biraz bóligi qoldanylmaıdy. Basshylarynyń aıtýynsha, adamdardy oqytyp, qural-jabdyqtardy montajdaý úshin ýaqyt kerek. Sondyqtan da bul jýyq arada iske aspasa, sharalar qabyldaımyz. Materıaldardy sotqa joldaýǵa deıin baramyz, – deıdi Iý.Ilın.
Qaraǵandy oblysy