2022 jylǵy álem chempıonatynyń toptyq kezeńindegi Portýgalııa men Gana arasyndaǵy oıyn aıaqtaldy, dep habarlaıdy Egemen.kz.
Tartysty ótken kezdesýde eýropalyq komanda 3:2 esebimen jeńiske jetti.
Kezdesýdiń 65-mınýtynda Krıshtıaný Ronaldý penaltıdi oryndady. Ganalyq qaqpashyny qapy qaldyrǵan portýgalııalyq fýtbolshy álem chempıonattaryndaǵy segizinshi golyn soqty. Esep – 1:0.
73-mınýtta ganalyq Andre Aııý esepti teńestirdi. Budan keıin portýgalııalyq oıynshylar úsh mınýttyń ishinde eki gol soǵyp úlgerdi. Atap aıtqanda, Hýan Felıks 78-mınýtta, Rafael Leao 80-shi mınýtta qarsylas qaqpasynan sańylaý tapty.
Degenmen Gana kezdesýde esep aıyrmasyn qysqartty. 89-mınýtta Osman Býkarı gol soǵyp, quramasyna úmit syılady.
Sońǵy mınýttarda qos quramada da gol salatyn múmkindikter boldy. Biraq tablodaǵy esep ózgerissiz qaldy.