Kelesi jyly Semeıde Kalgarı ýnıversıtetiniń fılıaly ashylady, dep habarlaıdy Egemen.kz.
«Biz Elbasynyń álemniń jetekshi ýnıversıtetterin tartý jónindegi tapsyrmasyn oryndaı otyryp, maqsatty túrde jumys jasadyq. Kanada bilim berý júıesi boıynsha álemde birinshi orynda. Bizde MakGıll ýnıversıteti men ál-Farabı atyndaǵy QazUÝ arasynda tamasha yntymaqtastyq bar. Kelesi jyly Semeıde Kalgarı ýnıversıtetiniń fılıalyn ashý týraly kelisimge qol jetkizildi. Bul óte mańyzdy serpilis. Biz osy baǵytta jumysty jalǵastyramyz», dedi Qazaqstannyń Kanadadaǵy elshisi Aqylbek Kamaldınov.
Ýnıversıtet fılıalynda qandaı mamandyqtar boıynsha oqýǵa bolatynyn ýnıversıtetterdiń ózderi sheshedi. Qazirgi ýaqytta saıası sheshim qabyldandy.
Joǵary oqý oryndarynyń eń mańyzdy reıtıngteriniń birinde – Dúnıejúzilik ýnıversıtetter reıtıngi ortalyǵy (CWUR) qurastyratyn álemdik ýnıversıtetterdiń akademııalyq reıtınginde Kalgarı Kanadada segizinshi, álem boıynsha 190-orynda. Reıtıng dúnıe júzindegi 20 myńǵa jýyq oqý oryndarynyń arasynan eń úzdik 2000 ýnıversıtetti kórsetedi.
Bıylǵy jyldyń mamyr aıynda Qazaqstannyń barlyq joǵary oqý oryndarynyń ishinde tek Nazarbaev Ýnıversıteti ǵana álemniń 19,8 myń ýnıversıteti arasynda TOP-2000 reıtınginde 1765-orynǵa ıe bolǵan.