Sınoptıkterdiń boljamynsha, demalys kúnderi elordada qarly boran, kóktaıǵaq jáne temperatýranyń tómendeýi bolýy múmkin. Qutqarýshylar turǵyndardan qala syrtyna shyqpaýdy suraıdy, dep habarlaıdy Egemen.kz Astana ákimdiginiń resmı saıtyny silteme jasap.
«Qazgıdromet» RMK sınoptıkteriniń málimetinshe, 26 jáne 27 qarashada Astanada aýa temperatýrasy kúndiz 22-24 aıazǵa deıin, túnde – 30-32 gradýsqa deıin tómendeıdi dep kútilýde. Búgin, 25 qarashada qalada qarly boran, qatty jaýyn-shashyn jáne ekpindi jel bar.
Aýa raıynyń nasharlaýyna, kórinýdiń shektelýine, aýa temperatýrasynyń tómendeýine baılanysty Astana qalasynyń Tótenshe jaǵdaılar departamenti elorda turǵyndary men qonaqtaryna kún raıynyń ózgerýi jáne engizilgen shekteýler týraly meteorologııalyq qorytyndylardy (onyń ishinde Darmen qosymshasy arqyly) qadaǵalaýdy, qala shetine shyqpaýdy, saq bolýdy keńes etedi.
Tótenshe jaǵdaı týyndaǵanda «112» telefonyna qońyraý shalý kerek.
Esterińizge sala keteıik, 25 qarasha kúni tańerteń elorda kósheleriniń qaryn kúreýge 2,5 myńǵa jýyq jol jumysshy shyǵyp, 1000-nan astam arnaıy tehnıka jumyldyrylǵan edi.