Shyǵys Qazaqstan oblysynda boranda adasyp ketken eki shopan tabyldy, dep habarlaıdy Egemen.kz ShQO Tótenshe jaǵdaılar departamentiniń baspasóz qyzmetine silteme jasap.
26 qarashada Zaısan aýdanyndaǵy sharýa qojalyǵynyń basshysy qutqarýshylarǵa habarlasqan. Ol Qaratal aýylynyń mańynda mal izdeýge ketken 2 shopannyń joǵalǵanyn jetkizgen. TJD qyzmetkerleri jol talǵamaıtyn «KÝNG» avtokóligimen kómekke attanǵan.
«Qutqarýshylar qatty aıaz ben qarly boranǵa qaramastan 1963 jáne 1983 jylǵy er adamdardy izdestirdi. Shopandardyń biri «Jadyra» sharýa qojalyǵynan 5 shaqyrym jerde tabyldy. Al ekinshisi kóp uzamaı óz betimen oraldy. Shopandarǵa medısınalyq kómek qajet bolmady», delingen habarlamada.