Aýstralııada asyǵymyz alshysynan túse me?

1989-2019 jyldar ara­ly­ǵynda jasyl qurlyqta Hopman kýbogi ótip turǵany ózderińizge málim. Onyń Devıs kýbogi men Bıllı Djın Kıngtiń jarysynan aıyr­mashylyǵy bul jerde aralas komandalar óner kórsetedi. Iаǵnı kortqa erler de, áıelder de shyǵady. Kezinde Aýstralııa quramasynyń Devıs kýboginde 15 márte jeńiske jetýine ólsheýsiz úles qosqan ataqty bapkerdiń qurmetine otan­dastary Hopman kýbogin ótkizý jóninde bastama kótergen edi. Bul ıdeıa halyqaralyq tennıs qaýymdastyǵy basshylary tarapynan qoldaý tapty. Bul jarys­ta eń zor tabysqa jetken AQSh quramasy. Amerıkalyqtar alty ret (1997, 2003, 2004, 2006, 2008, 2011) bas júldeni oljalady. Ekinshi orynda – Ispanııa (1990, 2002, 2010, 2013) men Shveısarııa (1992, 2001, 2018, 2019). Olar tórt retten teńdessiz dep tanyldy. Slovakııa úsh ret (1998, 2005, 2009) top jarsa, Germanııa (1993, 1995), Aýstralııa (1999, 2016), Fransııa (2014, 2017) jáne Che­hııada (1994, 2012) ondaı ataq­tar­­­dyń ekeýi bar. Al OAR (2000), Re­seı (2007), Polsha (2015), Che­ho­­slovakııa (1989), Iýgoslavııa (1991) jáne Horvatııa (1996) bir-bir retten sondaı qurmetke bó­­lendi.

Sońǵy eki jarystyń fınaly Shveısarııa men Germanııa tennısshileri arasynda ótti. Eki retinde de alǵashqylarynyń asyǵy alshysynan tústi. Esep – 2:1. Jeńimpaz komandanyń sapynda «Úlken dýlyǵa» sana­tyndaǵy týrnırlerdiń 20 dúrkin jeńimpazy, sol kezdegi álemniń birinshi raketkasy Rod­jer Fe­derer men Olım­pıada chempıo­ny Belında Benchıch syndy jul­dyzdar óner kórsetti.

Keıinnen ol ATR kýbogi degen ataýǵa ıe boldy. Atalǵan týr­­­nırde tek erler ǵana baq synady. 2020 jyly Serbııa ozdy. Serbter jartylaı fınalda Re­seıdi utsa, fınalda Ispanııany tize búktirdi. 2021 jyly Reseıdiń baǵy jandy. Olar Italııadan aılasyn asyrdy. Onyń aldynda nemisterdi utqan bolatyn. Bıyl Kanadanyń qarqynyna eshkim shydaı almady. Sheshýshi saıysta Úıeńki japyraqtar eliniń ókilderi ıs­pandyqtardan basym tústi. Mine, endi uıymdastyrýshylar erler men áıelderdiń basyn qo­satyn bá­seke uıymdastyrýdy qup kórip otyr.

Jasyl qurlyqta Qazaqstan Polsha jáne Shveısarııamen birge V tobynda oınaıdy. Bul básekeler Brısben qalasynda ótedi. Bul komandalardyń ekeýi myqty. Pol­shanyń sapynda Rolan Gar­rostyń eki dúrkin jáne AQSh-tyń ashyq birinshiliginiń jeńimpazy Iga Sventek bar. Odan bólek, búgingi tańda álemniń birinshi raketkasy atanyp otyr­ǵan 21 jastaǵy ten­nısshi WTA týrnırlerinde 11 ret top jardy. Jasy 30-dan assa da myqtylarmen ıyq tiresip júrgen Magda Lınettiń de qazirgi baby jaman emes. Erler saıysynda Hýbert Hýrkachtyń qarqyny qýantady. 25 jastaǵy Vroslavtyń týmasy byltyr Ýımbldonnyń jartylaı fınalyna deıin jetip, bes birdeı ATR týrnırlerin utty. Bul kúnderi ol álemdik reıtıngte úzdik ondyqty túıindeýde. 26 jastaǵy Kamıl Maıhshak ATR tiziminde 78-oryndy ıelenýde.

Dańqty Rodjer Federer bıyl úlken sportpen qosh aıtysty. Biraq soǵan qarap, Shveısarııa qura­masy álsirep qaldy degen oı týyndamaýy kerek. 25 jas­taǵy Belında Benchıch qazir naǵyz babynda. WTA tiziminde ol 12 satyǵa jaıǵasty. Benchıchtiń qorjynynda Olımpıada altynynan bólek, sol jarystyń kúmis júldesi bar. Ony ol Tokıodaǵy oıyndardyń juptyq saıysynda jeńip aldy. Belındamen túıdeı qurdas Jıl Taıkmann úzdikter reıtınginde 35-orynda tursa, tájirıbeli Vıktorııa Golýbıch 76 satyǵa taban tirep tur. Erlerdiń arasynda 58-orynǵa turaqtaǵan Mark-Andrea Hýslerdiń aıaq­­-

alysy jaman emes. 37 jastaǵy Sten Vavrınka da qajet kezde óz komandasyna kó­mekke kelý­ge daıar. Lozannada dú­nıege kel­gen áıgili oıynshy ke­zinde Aýstralııa men AQSh-tyń ashyq birinshilikterinde aldyna jan salmaı, Rolan Garrosta da dara shyqty.

United Cup týrnırinde Qazaq­stannyń namysyn Aleksandr Býblık, Tımofeı Skatov, Denıs Evseev, Grıgorıı Lomakın, Iýlııa Pýtınseva, Jibek Kulambaeva jáne Gozal Aınıtdınova syndy tennısshiler qorǵaıdy. Eger olar tabysty óner kórsetse, reıtıngte 500 upaıǵa deıin ıelenýlerine jaqsy múmkindik bar.

О́zge toptarda myna komandalar ózara sheberlik baıqasady: A toby: Grekııa, Belgııa, Bolgarııa. S toby: AQSh, Germanııa, Chehııa. D toby: Ispanııa, Aýstralııa, Uly­­brıtanııa. E toby: Italııa, Bra­zılııa, Norvegııa. F toby: Fran­sııa, Horvatııa jáne Argen­tına. Ár qurama bir-birimen bes kez­desýden ótkizedi. Erler men áıelder eki retten kortqa shyqsa, bir báseke aralas juptar arasynda uıymdastyrylady. Eger jerlesterimiz óz tobynda birin­­shi oryn alsa, E tobynyń úz­digimen she­berlik baıqasady. Olar­dy utqan jaǵdaıda ǵana pleı-offqa joldama alamyz. Odan keıin jartylaı fınaldyq jáne fınaldyq saıystar ótedi.