Áýe tasymalyna suranys jyl saıyn ulǵaıyp keledi. Sol sebepti artyp kele jatqan suranysty qanaǵattandyrý úshin otandyq áýe kemeleriniń parki jańa ushaqtarmen tolyqtyrylyp jatyr. Sondaı-aq reısterdiń keshigý faktilerine baılanysty shaǵymdardy eskere otyryp, Azamattyq avıasııa komıteti men Qazaqstannyń avıasııalyq ákimshiligi tarapynan tıisti tergeýler júrgizildi.
– Qazaqstannyń avıasııalyq bıligi halyqaralyq standarttardyń joǵary deńgeıine saı bolýyna baılanysty jaqsy jumys atqardy. Qazir Eýropalyq komıssııanyń Ushý qaýipsizdigi komıtetimen ózara tyǵyz baılanys ornatylǵan. Dese de alda aýqymdy jumys kútip tur. О́ıtkeni Memleket basshysy Qasym-Jomart Toqaev ushý qaýipsizdigin qamtamasyz etý men halyq úshin qolaıly jaǵdaı jasaý máselelerine basymdyq berip keledi. Sonymen birge elimizdiń Prezıdenti ushý geografııasyn keńeıtý men reıster sanyn ulǵaıtýǵa baılanysty jumysty jalǵastyrýdy tapsyrdy, – dedi Qazaqstannyń avıasııalyq ákimshiliginiń qyzmetimen tanysqan Indýstrııa jáne ınfraqurylymdyq damý mınıstri Qaıyrbek О́skenbaev.
Onyń aıtýynsha, ushý geografııasyn keńeıtý men reıster sanyn ulǵaıtý boıynsha jumystar kún tártibinen túspeýi kerek.
Qazaqstannyń avıasııalyq ákimshiliginiń bas dırektory Katalın Radý júrgizilip jatqan jumystar men ushý qaýipsizdigin qamtamasyz etý jónindegi mindetterdi iske asyrý týraly jetkizdi. Onyń aıtýynsha, osy jyldyń basynan bastap Qazaqstan men Amerıka Qurama Shtattary arasyndaǵy tikeleı reısterdi iske qosý úshin FAA (IASA) aldaǵy halyqaralyq ushý qaýipsizdigin baǵalaýǵa daıyndyq sheńberinde tehnıkalyq áleýetti arttyrý boıynsha jumystar júrgizilip keledi.
Azamattyq avıasııa komıtetiniń tóraǵasy Talǵat Lastaev aıtqandaı, tekserý qorytyndysyna sáıkes Qazaqstan ushý qaýipsizdigin qamtamasyz etý deńgeıin 84 paıyzǵa deıin arttyrdy. Bul álemdik ortasha kórsetkishten 15 paıyzǵa joǵary.
Osy oraıda avıasııalyq ákimshilik azamattyq avıasııanyń ushý qaýipsizdiginiń tehnıkalyq baqylaýy men qadaǵalaý jumystaryna jaýapty ekenin aıta ketken jón. Qazir Qazaqstannyń Memlekettik tiziliminde 912 áýe kemesi bar. 75 keme turaqty jolaýshylar reısterin júzege asyrady. Tutastaı alǵanda, elimizde 25 áýejaı men 6 tikushaq aılaǵy jumys isteıdi.
Mınıstr atalǵan salany damytý boıynsha birqatar mindetti atap, Azamattyq avıasııa komıtetine avıasııalyq ákimshilikpen birlesip, ushý qaýipsizdigi máselesin erekshe baqylaýda ustaýdy tapsyrdy.
– Ras, qazir áýe kóliginde jolaýshylar aǵynynyń artýy baıqalyp keledi. Sondyqtan áýe kemesiniń parkin ulǵaıtý jáne qazaqstandyq áýe kompanııalardyń tasymaldaý syıymdylyǵyn arttyrý boıynsha jumysty jalǵastyrý mańyzdy, – dedi Q.О́skenbaev.