Prezıdenttiń Astanadaǵy ulyqtaý is-sharasynan soń birden óz ýádelerin oryndaýǵa shuǵyl kiriskeni aýyl turǵyny retinde meni aıryqsha tolǵantty. Q.Toqaev aýyldy damytýǵa arnalǵan Jarlyqqa qol qoıdy. Ustaǵannyń qolynda, tistegenniń aýzynda ketip, toz-tozy shyqqan eldi mekenderdiń qaıta túleıtinine sengendeımin.
Bir kezderi 5 myńǵa jýyq halqy bar aýylymyzda qazir nebári myńnan astam adam turady. Olardyń kóbi – zeınet jasyndaǵy qarttar men bala-shaǵa. Eńbekke jaramdylardyń basym bóligi jumyssyz júr. Burynǵy sharýashylyq, qurylys nysandarynyń birde-bireýi joq. Qystygúni mektep, mádenıet úıi, aýyldyq feldsherlik-ambýlatorlyq pýnkt, ákimdik ǵımarattary jeke-jeke óz qazandyqtaryn iske qosqanda aýyldyń ishin kók tútin basyp ketedi.
Aýylda mal jaıatyn jaıylymdyq jer tapshy, jańadan keletin jas mamandarǵa baspana qarastyrylmaǵan. Kezinde jaıylymdar men shabyndyq jerlerdi ebin tapqan pysyqaılar bólisip alǵan-dy. Aýyl ishinde mal kóbeıgendikten jazda jas tezektiń ıisi shyǵyp, jınalyp qalǵan kúl-qoqys qolqańdy qabady. Sondyqtan burynǵydaı tórt túlikti aýlaqqa shyǵaryp, tıesili jerlerin berip, jeke sharýashylyqtaryn damytýǵa jaǵdaı jasaý kerek dep sanaımyn.
Ár aýylda bir kooperatıvten quryp, ortalyqtandyrylǵan júıe qajet. Jergilikti jerlerde pisken shujyq, maı shyǵaratyn, sút, qaımaq aıyratyn seh ashýdy da qolǵa alý kerek. Qazir, mine, soǵymnyń ýaqyty, qanshama mal soıylyp, terisi men múıizi, tuıaǵy dalada shashylyp qalady. Jazda qyrqylǵan qoı júni de aıaq astynda jatady. Osynyń bárin kádege jaratatyn ýaqyt jetti. Bul ıgilikter kelse, aýyldaǵy aǵaıynǵa jumys tabylyp, eldiń hal-ahýaly kóteriledi. Tamaq ónimderiniń ózindik quny arzandaıdy. Kıim-keshek te ózimizden shyǵarylar edi.
Muhamet-Qaıyr ShÁRIPOV,
aýyl sharýashylyǵy salasynyń ardageri
Pavlodar oblysy,
Baıanaýyl aýdany,
Jańatilek aýyldyq okrýgi