Keıingi jyldary mektepterdegi oryn tapshylyǵy kókeıkesti máselege aınalǵany belgili. Ásirese shaǵyn aýdandarda turatyn oqýshylardyń jaıly mektepterge jetýi qıyndap ketken edi. Osy olqylyqtyń ornyn toltyrý baǵytyndaǵy jumystardyń biri retinde Almaty qalasynyń Naýryzbaı aýdanyndaǵy «Dostyq» shaǵyn aýdanynda №208 jáne Alataý aýdanyndaǵy «Botakóz-2» shaǵyn aýdanynda №209 mektep-gımnazııasy ashyldy.
Jańa mektepterdiń ashylý saltanatynda Bilim basqarmasynyń basshysy Lázzat Jylqybaeva qalalyq ákimdik tarapynan mektep salý isiniń jalǵasyp jatqanyn jetkizdi.
«Ishki-syrtqy mıgrasııa, demografııalyq ahýaldy eskeretin bolsaq, qalada oqýshy sany jyl saıyn 13-15 myń balaǵa kóbeıip keledi. Búginde ońtústik astanada 210 memlekettik mektep jumys isteıtin bolsa, oqýshy ornynyń tapshylyǵy 29 myńnan asady. Osy oraıda kelesi oqý jylynan bastap «Jaıly mektep» jobasy jalǵasyn taýyp, 22 mektep salynady, 37 myńnan asa oqýshy orny ashylady. Buǵan qosa 1000 mektep jobasyna oraı 2025 jylǵa deıin 36 mektep qurylysy júrgiziledi», dedi L.Jylqybaeva.
Bilim basqarmasy basshysynyń aıtýynsha, qaladaǵy úsh aýysymdy mektepter máselesi tolyǵymen sheshilgen. Jer telimderiniń tapshylyǵyna baılanysty ortalyq aýdandarda jańa mektep salýmen qatar japsarlas qurylystar salý jumystary júrgizilip jatyr. Osy oraıda bıyl 5 ǵımarat qoldanysqa berilse, jyldyń aıaǵyna deıin tórteýi iske qosylady. Sonymen qatar balalardy mektepke tasymaldaý máselesi de birte-birte sheshilip keledi. Ata-analardyń suranysyna baılanysty 70-ten asa mektepten ótinish túsken. Qazirgi kezde «Tomırıs» shaǵyn aýdanyndaǵy №205 mektepte qanatqaqty joba iske asýda. Qarjylandyrý jaǵy sheshiletin bolsa, qoǵamdyq kólik júrmeıtin aýdandarda keler jyldyń qańtarynan bastap oqýshylardy mektepke tasymaldaý qolǵa alynady.
Jańadan ashylǵan bilim oshaqtarynda bir aýysymda 3 myńǵa jýyq oqýshynyń bilim alýy qarastyrylǵan. Munda erekshe qajettilikteri bar balalarǵa da qolaıly jaǵdaılar bar. Búginde qala boıynsha 2 myńnan asa erekshe qajettilikteri bar balalar bolsa, olar 8 arnaıy ınternattarmen qatar ózge de bilim oshaqtarynda bilim alýda. Almaty qalasynyń 2025 jylǵa deıingi damý baǵdaralamasyna sáıkes ınklıýzıvti ortada sabaq beretin myńnan asa muǵalimdi jyl saıyn oqytyp otyrý kózdelip otyr.
Qazirgi ýaqytta №208 mektep-gımnazııasyndaǵy 37 synypta 960 oqýshy qazaq tilinde bilim alady. Zamanaýı oqý ǵımaratynda tolyqtaı jabdyqtalǵan 8 blok, 72 oqý kabıneti bar. Bastaýysh jáne 5-9, 10-11-synyp oqýshylary arnaıy bloktarda oqıdy. Mektepke Gúlbada Ádenova basshylyq etedi. «Botakóz-2» shaǵyn aýdanyndaǵy №209 mektepte 2 851 oqýshy bilim alýda. Bul mekteptiń dırektory – Nurlan Adamov. Synyp sany – 109. Oqýshylar qazaq jáne orys tilderinde bilim alady. Mektepte panoramalyq áınektelgen 77 oqý kabıneti ınteraktıvti panelmen, smart taqta jáne zamanaýı modıfıkasııadaǵy jıhazdarmen jabdyqtalǵan. Ergonomıkalyq ınterermen erekshelenetin mektep dálizderi men keńseleri keń.
Zamanaýı mektepterde medıateka, kitaphana, syrtqy sport alańy men oıyn alańdary oqýshylarǵa qolaıly etip jasalǵan. Bıologııa, hımııa, fızıka kabınetteri zerthanalar, praktıkalyq jumystarǵa qajetti kórneki quraldarmen qamtamasyz etilse, arnaıy stanoktarmen jabdyqtalǵan aǵash jáne metall sheberhanalarynda, saz ben qyshty óńdeýge arnalǵan quraldarda oqýshylar zor qyzyǵýshylyqpen jumys isteıtini sózsiz. Aspazdyq kabınetter, mata óńdeý jáne tehnologııa sheberhanalary qyz balalar úshin qolaıly. Sport zaldar soundex dybys ótkizbeıtin panelderimen qaptalyp, sonaspray búrikkish qurylǵylarymen qamtamasyz etilgen. Zamanaýı ashana da erekshe árlengen. Face ID zamanaýı júıesimen jabdyqtalǵan mektepte balalardyń qaýipsizdigine erekshe kóńil bólinip otyr. Ata-analarǵa da qolaıly jaǵdaılar qarastyrylyp, balalardyń mektepke kirip-shyqqany týraly habarlama ala alady.
ALMATY