* Bıylǵy jyldyń 5 aıynda «Jumyspen qamtý» baǵdarlamasy boıynsha 40 myńnan astam azamat jumysqa ornalasty. Bul týraly keshe málimdegen Eńbek jáne halyqty áleýmettik qorǵaý mınıstri Tamara Dúısenova jyl sońyna deıin ózin ózi jumyspen qamtyǵan, jumyssyzdar men az qamtamasyz etilgen adamdar qatary 154 myńǵa jetetinin aıtty.
* Pavlodarda bıyl aımaqtyq tehnopark ashylatyn boldy. Oblys ákiminiń birinshi orynbasary Dúısenbaı Turǵanovtyń aıtýynsha, qazirgi tańda jergilikti joǵary oqý oryndary men ónertapqyshtar ártúrli salalarda 200-ge jýyq ǵylymı-zertteý jumystaryn júrgizýde. Al jańa ortalyq qyzmeti jeke-jeke ǵylymı ıdeıalar men ázirlemelerdi shoǵyrlandyrýǵa, ǵylymı-zertteý jumystaryn júrgizýge jáne zamanaýı ınnovasııalyq tehnologııalardy engizýge baǵyttalady.
* Ońtústik Qazaqstanda stýdent-jastar Eýrazııalyq odaq týraly oılaryn ortaǵa saldy. Oblystyq memlekettik pedagogıkalyq ınstıtýtta ótken bul jıynda aımaq basshysy Asqar Myrzahmetov jas tolqynnyń kóptegen suraqtaryna jaýap bere kelip, olardy buqaralyq mádenıetti kóterý, joǵary adamgershilik qasıetterdi qalyptastyrý sııaqty búkil qoǵam bolyp atqaratyn sharalarǵa belsene atsalysýǵa shaqyrdy.
* Qazaqstandaǵy alǵashqy AES Kýrchatov qalasynda salynady. Ulttyq ıadrolyq ortalyq taratqan aqparatta bul stansanyń elimiz shyǵys óńirinde boı kóterýine onda qýat kózderine degen suranystyń jyldan jylǵa artyp kele jatqany negizgi sebep boldy.
* Qyzylordada «Bıznestiń jol kartasy-2020» baǵdarlamasy aıasynda quny 1 mlrd. 715 mln. teńgeni quraıtyn 13 joba júzege asyrylýda. Qala ákimi Nurlybek Nálibaev oblys ortalyǵynda jyl basynan beri kásipkerler qatary 300-den asa sýbektimen tolyǵyp, olardyń 26309-dy quraǵanyn aıtyp otyr.
* Almatyda 2 myńnan asa búldirshin balabaqshamen qamtylady. Jalpy, bıyl munda 18 memlekettik balabaqshanyń qurylysy josparlanǵan. Olardyń 16-sy jyl ishinde beriledi. Qalalyq bilim basqarmasynyń basshysy Rahat Shımasheva qalǵan 640 oryndyq 2 balabaqshanyń 2015 jyldyń enshisinde turǵanyn jetkizdi.
* Keshe «Astana-Shymkent» baǵytyndaǵy jańa jolaýshylar poıyzy jolǵa shyqty. Quram «Talgo» júrdek vagondarynan jasaqtalǵan. Onda 22 vagon bar. Bolat joldyń kóligi Astanadan Shymkentke deıin 15 saǵat 35 mınýtta jetse, qaıtar joldy 16 saǵat 01 mınýtta kókteı ótedi.
* Qostanaı oblysynyń 356 oqýshysy jazǵy demalystaryn mektep orman sharýashylyqtarynda ótkizedi. Oblystyq bilim berý basqarmasynyń bastyǵy Ú.Tórtqaraevanyń aıtýyna qaraǵanda, olar osy mezgilde eńbek jáne ekologııalyq tárbıe alady, orman alaptaryn tazalaý, týǵan ólkeniń tabıǵatyn zertteý jumysymen aınalysady.
«QazAqparat», BNews.kz, Altaynews.kz, Alau.kz, Egemen.kz habarlary boıynsha
daıyndaldy.