Kókshetaýda Shahmet Qusaıynov atyndaǵy Aqmola oblystyq qazaq mýzykalyq-drama teatrynyń janynan ashylǵan tuńǵysh qýyrshaqtar teatry kishkentaı kórermenderin kól-kósir qýanyshqa keneltti.
Aýmaǵy at shaptyrym teatr foıesin kishkentaı kórermenderdiń syńǵyrlaǵan kúmis kúlkisi toltyryp, tóńirekti shattyqqa bólep turdy. Aldymen, tuńǵysh qýyrshaq teatrynyń ashylý rásimi ótkizildi. Aqjarma tilekter aıtylyp, shashý shashyldy. Kórermender zalyna ótken kishkentaı búldirshinderdiń nazaryna Nına Gernettiń «Balapan qaz» ertegisi usynyldy. Buryn-sońdy mundaıdy kórmegen búldirshinder tańǵajaıyp tamasha ertegini kórip otyryp, keıipkerlerdiń tosynnan qoıǵan suraqtaryna tapqyr jaýap bere bildi. Osynyń ózi sahna men kórermender zalyn tutastyryp, ertegi álemine eliktirip áketip bara jatqandaı. Ár kórermen sıqyrly dúnıege engen.
Jas trýppa dýaldi oqý júıesi boıynsha arnaıy kelgen Qazaq ulttyq óner ýnıversıtetiniń stýdentterinen quralǵan. Top jetekshisi ári «Balapan qaz» ertegisiniń qoıýshy rejısseri Qazaqstan Respýblıkasynyń eńbek sińirgen mádenıet qaıratkeri Serikbaı Maqulbekov. Kishkentaılar kóńilinen shyqqan balapan qaz – Aqerke Damý, kirpi – Arsen Baltabaı, Nurlybek Tileýles, túlki – Dıas Shárip.
– Ertegimen eseıgen jaqsy. Qoıylym jas kórermenderimizdiń kókiregine oı salary sózsiz. Sonda rýhanı kemeldenýdiń alǵashqy baspaldaǵyn basatyn bolady, – deıdi qoıýshy rejısser Serikbaı Maqulbekov.
Izetti ul-qyzdy izgilik álemine jeteleıtin qýyrshaq teatrynyń alǵashqy kórermenderine bul syı tegin jasaldy. Búldirshinder budan bylaı da ádemi álemniń ajarymen qaýyshyp, kókirekterin rýhanı sáýle nurymen jaryq etpek.
Kókshetaý qalasy