Mınıstrler balalar basylymyna qoldaý bildirdi

Atap aıtsaq, Aqparat jáne qoǵamdyq damý mınıstri Darhan Qydyráli «Egemen Qazaqstan», «Kazahstanskaıa pravda», «Astana aqshamy», «Vechernıaıa Astana», «Qazaq ádebıeti», «Ana tili», «Túrkistan», «Ulan», «Baldyrǵan». «Drýjnye rebıata» gazet-jýrnaldaryna jazyldy.

«El Prezıdenti Qasym-Jomart Toqaev osy jyldy Bala­lar jyly dep jarııa­la­ǵany belgili. О́skeleń urpaqtyń bo­la­shaǵyna basa mán berý – mem­lekettik ıdeologııanyń basym baǵyt­tarynyń biri. Osy rette balalarǵa arnalǵan basylymdardy qoldaý negizdi dep bilemiz», dedi Darhan Qydyráli.

Sondaı-aq mınıstr Memleket basshysy jańa prezıdenttik merzim­degi birinshi Jarlyǵyn aýyl­dardy damytý máselesine arna­ǵanyn, aýyldardyń baspa­sóz­ben qamtylýy, olarǵa basy­lymdar­dyń ýaqtyly jetýi asa mańyzdy ekenin, osy baǵyttaǵy búgingi jasalyp jatqan naqty ister óz nátıjesin beredi dep oılaıtynyn atap ótti.

Aıta keteıik, Aqparat jáne qoǵamdyq damý mınıstrligi men «Qazposhta» AQ aqparat salasyn damytý boıynsha yntymaqtastyq týraly memorandýmǵa qol qoıǵan. Onyń aıasynda respýblıkalyq jáne óńirlik baspa basylymdaryn ýaqtyly jetkizýdi júzege asyrý jóninde kelisim de bar. Sonymen birge mınıstr merzimdi basylymdarǵa onlaın jazylý úshin mınıstrlik tarapynan qoldaý jumystary jasalyp jatqanyn jetkizdi.

Oqý-aǵartý mınıstri Ashat Aıma­ǵam­betov te aldaǵy jylǵa ba­lalar basylymdaryna jazyl­ǵan. Vedomstvo basshysy muǵali­m­derge májbúrli túrde gazet-jýr­nalǵa jazylý júrgizilmeıtinin aıtty.

«Pedagog mártebesi týraly» zań qabyldanǵaly beri muǵalimderdi gazetke jazylýǵa mindettep, májbúrlemeıdi. Qazir bul úshin ákimshilik jaýapkershilik bar. Biz mundaı faktilerdi boldyrmaımyz. Alaıda mektepterdiń ózderi bólingen bıýdjet esebinen balalardyń qyzyǵýshylyqtaryn eskere otyryp, «Oqýǵa qushtar mektep» jobasy aıasynda mektep kitaphanalary úshin balalarǵa arnalǵan «Aqjelken», «Drýjnye rebıata», «National Geographic» t.b. gazet-jýrnaldarǵa jazyla alady», dedi mınıstr.

Is-shara barysynda «Qazposh­ta» AQ basqarma tór­­aǵasy Ásel Janasova baspasóz basylym­dary­na jazylý naý­qanyna baılanys­ty jumys­tary­men tanystyr­dy. Son­daı-aq al­daǵy ýaqytta post.kz qo­symshasy arqyly kez kel­gen basylymǵa onlaın jazylýǵa múm­kindik bolatynyn aıtty.

«Onlaın-jazylym – bul oqyr­man men merzimdi basylym­dardyń arasyn jaqyndatý maq­satynda jasalyp jatqan joba. Ári búgingideı jańa tehnologııanyń zamanynda halyqtyń ýaqytyn únemdeý úshin, bir tetik arqyly kez kelgen gazetke jazyla alýy úshin, onyń aqysyn ońaı tóleı alýy úshin kerek. Budan bólek respýblıkanyń túkpir-túkpirindegi aýyldardaǵy oqyrmanǵa basylymyn ýaqytynda jetkizý jumystaryn jetildirýdi de qarastyryp jatyrmyz. Máselen, dál osy gazet-jýrnal tasıtyn poshtashylardyń mártebesin arttyrý, jumysqa yntalandyrý maqsatynda arnaıy bonýs beriletin bastamany qolǵa almaqpyz», dedi Ásel Janasova.

Sondaı-aq ol 3 qarashada bas­tal­ǵan baspasózge jazylý naý­qany 25 jeltoqsanǵa deıin jalǵa­satynyn, qazirdiń ózinde 11 mıllıon jazylym bar ekenin atap ótti.

«Jazylym naýqany belgili bir ýaqytpen ǵana shektelmeýi kerek. Oqyrman jyl boıy kez kelgen ýaqytta jazyla alatyndaı múmkindik jasalsa deımin. Iаǵnı gazet-jýrnaldarǵa jazylý kerek ekeni halyqtyń jadynda saqtalýy úshin ony qoljetimdi etýimiz qajet. Máselen, kaspi.kz, post.kz qosymshalarynda, kundelik.kz syndy oqýshylardyń keńistiginde de kórsetilip tursa, ýaqyt óte kele sanada jattala bas­taıdy. Nátıjesinde, qoǵamda oqý mádenıeti qalyptasady. Halyq kúndelikti gazet-jýrnal oqýǵa úırenedi», deıdi «Qazposhta» AQ basqarma tóraǵasy.

Atalǵan «Qazposhta» meke­mesiniń kireberisinde kópte­gen respýblıkalyq merzimdi basylym satylatyn arnaıy burysh bar. Mundaǵy satýshy Jupar Qasenova halyq negizinen «Egemen Qazaqstan», «Vechernıaıa Astana», «Aıqyn, «Ana tili», «Túrkistan», «DAT» gazetterin kóp oqıtynyn aıtady. Máselen, kúnde tańerteń poshtanyń esigi ashylmastan kelip úlgeretin ««Egemen Qazaqstan» gazeti 105 teńgeden satylady. Satýshynyń aıtýynsha, basylym keıde túske deıin túgeldeı satylyp ketedi.