Elordada jer salasyndaǵy zańdylyqty saqtaý, sondaı-aq medısınalyq buıymdardy satyp alý máseleleri jóninde alqa otyrysy ótti. Bas prokýror Berik Asylovtyń tóraǵalyǵymen ótken alqa jumysyna Májilis depýtattary, aýyl sharýashylyǵy, ekologııa, geologııa jáne tabıǵı resýrstar mınıstrlikteriniń basshylary jáne basqa da múddeli mamandar qatysty.
B.Asylov jıyn barysynda bıyl prokýrorlardyń muryndyq bolýymen memleketke qoldanylmaǵan 1,5 mln ga jer qaıtarylǵanyn atap ótti. Aýyl sharýashylyǵy mınıstrligimen birlesip qolǵa alynǵan is-sharalardyń arqasynda qoǵamdyq jaıylymdardyń tapshylyǵy 29 mln gektardan 8 mln gektarǵa deıin qysqartylǵan. Soltústik Qazaqstan, Aqmola jáne Almaty oblystarynda 11 myń úleskerge 500 myń ga astam jer qaıtaryldy.
Tekserýler kezinde olıgopolııalardyń qoldanýyndaǵy eń jaqsy jáne qunarly aýylsharýashylyq jerlerin, jaıylymdar men kommersııalyq ýchaskeler anyqtalyp, olardan memleket paıdasyna 145 myń gektar jer tárkilengen.
Tekserý qorytyndysy boıynsha 56 qylmystyq is qozǵalyp, 9 kináli adam sottaldy. Sondaı-aq Shymkent, Aqmola, Atyraý, Almaty jáne Túrkistan oblystary ákimdikteriniń Jer qatynastary jáne aýyl sharýashylyǵy boıynsha basqarmalarynyń laýazymdy tulǵalaryna, sondaı-aq Shyǵys Qazaqstan, Batys Qazaqstan, Soltústik Qazaqstan, Mańǵystaý jáne Qyzylorda oblystarynyń jeke jer paıdalanýshylaryna qatysty 56 qylmystyq is qozǵaldy.
Búgingi kúni qylmys jasaǵan 9 adam sottaldy. Mysaly, Soltústik Qazaqstan oblysynda 800 úleskerlerdiń jer telimderin asyra paıdalanyp, alaıaqtyq jasaǵan kásiporyn basshysy 6 jylǵa bas bostandyǵynan aıyryldy.
Alqa otyrysynda Berik Asylov ýákiletti organdardyń jaıylym jerlerin oń basqarýdyń, iri jer telimderdiń bir qolǵa shoǵyrlanýyna jol bermeý jáne úlestik jerlerge baqylaýdy kúsheıtýdiń, onyń ishinde kez kelgen zańsyz shemalardy boldyrmaý jumysynyń mańyzdylyǵyna nazar aýdaryp, Aýyl sharýashylyǵy mınıstrligine naqty is-sharalar josparyn daıyndaý arqyly zań buzýshylyqtardy joıý týraly talaptar qoıyldy.
Jıynda talqylanǵan ekinshi másele boıynsha «Dárilik zattar men medısınalyq buıymdardy saraptaý ulttyq ortalyǵynyń» qyzmeti tekserisiniń nátıjeleri talqylandy.
Prokýrorlyq tekseris kezinde bıýdjet qarajatyn jymqyrý jáne joǵary baǵamen sapasyz medısınalyq tehnıkany satyp alý faktileri anyqtalǵan. Máselen, Aqtóbe oblysyndaǵy medısınalyq ortalyq jyljymaly shuǵyl medısınalyq kómek keshenin (jedel járdem) kedendik qunynan 4 ese artyq baǵamen satyp alǵan. Naryqtyq baǵasy 16,6 mln teńge bolsa, ortalyqqa 72,9 mln teńge jumsalǵan.
Osyǵan uqsas zańsyzdyqtar Almaty qalasynda, Aqmola, Atyraý, Qaraǵandy, Qostanaı, ShQO, BQO, Jambyl jáne Pavlodar oblystarynda da anyqtalyp otyr. Tekseris nátıjeleri boıynsha prokýratýra zań buzýshylyqtaryn joıý týraly 208 usynym engizip, 405 adam tártiptik jáne ákimshilik jaýaptylyqqa tartyldy, 15 sotqa deıingi tergep-tekserý bastaldy.
Qadaǵalaý vedomstvosynyń basshysy medısınalyq buıymdarǵa baǵany qalyptastyrýdyń ashyqtyǵyn qamtamasyz etý, sybaılas jemqorlyq faktorlaryn boldyrmaý qajettigin atap ótti.
Jıynǵa qatysýshylar kásipkerlerdiń ótinimderin qabyldaý prosesin avtomattandyrý, medısınalyq buıymdardy saraptaý tetigin qaıta qaraý, medısınalyq jabdyqtardy qadaǵalaý júıesin engizýdi usyndy.
Alqa jumysynyń qorytyndysy boıynsha Bas prokýror oblys prokýrorlaryna memleketke keltirilgen zalaldy óteýge qol jetkizýdi, sondaı-aq jymqyrý men bılikti asyra paıdalanǵan adamdar úshin qylmystyq jazanyń bultartpastyǵy qaǵıdatyn qamtamasyz etýdi tapsyrdy.