Úkimettiń keńeıtilgen otrysynda Memleket basshysy halyqtyń ál-aýqatyn jaqsartý týraly aıtty. Sonymen qatar eńbek qaýipsizdigi máselesine toqtaldy, dep habarlaıdy Egemen.kz.
«Negizgi taǵam ónimderiniń qymbattaýy ınflıasııanyń ósýine sebep bolyp jatyr. Azyq-túlik ınflıasııasy 24 paıyzdan asty. Turǵyndardyń aqshalaı tabysynyń ósý qarqyny sońǵy 5 jyldaǵy eń tómen deńgeıde tur.
Elimizde qaǵaz júzinde jumys isteıtin, ýaqytsha jumys istemeıtin, ózin-ózi nátıjesiz jumyspen qamtyǵan jáne jumyssyz dep kórsetilgen 900 myńǵa jýyq adam bar. Negizgi qujat – Halyqtyń tabysyn arttyrý baǵdarlamasy. Ony qazirgi jaǵdaılarǵa sáıkestendirý kerek», dedi Qasym-Jomart Toqaev.
Sondaı-aq ol óndiristik jaraqattardyń naǵyz problemaǵa aınalǵanyn da jasyrmady. Onyń aıtýynsha, bıyl óndiris ornynda 1124 jumysshy jaraqat alyp, onyń 157-si qaıtys bolǵan.
«ArselorMıttal Temirtaý» kásiporynynda 2006 jyldan beri 20-dan astam jazataıym oqıǵa bolyp, 100-den astam azamatymyz qaza tapty. Bıyldyń ózinde 14 adam qaıtys boldy, onyń ishinde 1 jumysshy ótken aptada kóz jumdy. Memlekettik organdar men qoǵamdyq uıymdardyń habarlamalaryna sáıkes, kompanııa eńbek, ekologııa jáne salyq zańdaryn buzyp, ınvestısııalyq mindettemelerdi oryndamaıdy. Qoǵam ádil ári shuǵyl sharalar kútýde. Sondyqtan bul jaǵdaıdy Premer-Mınıstr óz baqylaýyna alsyn», dedi Prezıdent.