Bıyl Jetisýǵa qys erte keldi. Byltyrǵydaı emes, qar da qalyń, aıaz da býyp tur. Jalpy, óńir aýmaǵynda qar basyp qalatyn 24 jol ýchaskesi bar. Búginde Tótenshe jaǵdaılar departamenti kún raıynyń nasharlaýyna baılanysty turǵyndarǵa alys saparǵa shyǵýǵa tyıym salýda. Qysta qaýipsizdik erejelerin saqtaý asa mańyzdy.
Jetisýdaǵy joldardyń jalpy uzyndyǵy 4 myń shaqyrymdy quraıdy, onyń 1 034 shaqyrymy – respýblıkalyq, 3 myń shaqyrymy oblystyq mańyzy bar joldar. Ony «Qazavtojol» JShS qadaǵalaıdy. Búginde merdiger kompanııalar joldardyń qys mezgilindegi daıyndyq jumystaryna 75 birlik tehnıka daıyndaǵan. Jyl saıyn qysqy ýaqytta aýa raıy qolaısyzdyǵynda qar qursaýynda 100-den asa júk jáne jeńil kólik qalyp qoıady eken. Bul adamdardyń ómirine qaýip-qater tóndiretin negizgi faktorlardyń biri bolyp tur. Mamandar júrgizýshilerge táýekelge barýdyń qajet emes ekenin eskertýde.
«Qysta kólik júrgizýshileri kóligine otyrǵan barlyq adamnyń ómirine jaýapty ekenin sezinýge tıis. Tótenshe jaǵdaılar departamenti men «Qazavtojol» qyzmetkerleri tarapynan qysqy mezgilge jol daıyndyǵy jumystary arnaıy buıryqqa sáıkes júrgizilýde. Taıǵaqqa qarsy qajetti jabdyqtar alynyp, qar tazartatyn tehnıkalar ázirlengen», deıdi «Qazavtojol» ulttyq kompanııasy» aksıonerlik qoǵamynyń Almaty oblystyq fılıaly dırektorynyń orynbasary Shyńǵyshan Muratbekuly.
Osy rette 2022-2023 jylǵy qys mezgiline daıyndyq jumystary jaıynda oblystyq Tótenshe jaǵdaılar departamenti Tótenshe jaǵdaılardy joıý basqarmasynyń bastyǵy Rınat Qarandashev pen oblystyq jolaýshy kóligi jáne avtomobıl joldary basqarmasy avtojoldar bóliminiń basshysy Aıdos Dosjanovtan maǵlumat alǵan edik. Olardyń aıtýynsha, oblystyq ákimshilik pen merdiger kompanııalar arasynda oblystyq mańyzy bar joldardyń tazartý jumystary boıynsha 9 kelisimshart jasalǵan.
«Qys mezgili bastalǵan sátten alǵashqy kómek kórsetetin 5 qutqarý sharasyna qatystyq, 4 adam qutqarylyp, 19 adam tótenshe jaǵdaı aýmaǵynan evakýasııalandy, 12 birlik tehnıka shyǵaryldy. Respýblıkalyq jáne oblystyq joldarda 14 ret kólik júrisin shekteý sharasy qoldanyldy. Turǵyndarǵa aldyn ala 48 SMS-habarlama joldandy», deıdi R.Qarandashev.
Oblys aýmaǵynda 2 jol-medısınalyq qutqarý pýnkti jumys isteıdi. Bul pýnktter sonymen birge jylyný oryndary esebinde qoldanylady. Budan bólek 30 jylyný orny, jol-paıdalaný basqarmasy bazalarynda 3 pýnkt, eldi mekenderdiń orta mektebi bazalarynda 18 pýnkt, 2 tamaqtaný pýnkti jáne 1 avtobeket bar. Tótenshe jaǵdaılar departamenti tarapynan KamAZ ben Ýral bazalarynda 6 jyljymaly jylytý pýnkti ornalasqan. Qysqy mezgilde aldyn ala habarlaý sharalaryn júzege asyrý barysynda 2 500-den asa nasıhat quraly taratylǵan eken.
Oblys aýmaǵyndaǵy joldarda oryn alýy múmkin tótenshe jaǵdaılardyń aldyn alý maqsatynda 237 adam men 79 birlik ótimdiligi joǵary tehnıka jumyldyrylǵan.
«Qysqy mezgilde alys jolǵa shyqpas buryn aýa raıy týraly maǵlumat alyp, onyń ózgerýi jaıynda aldyn ala joldanatyn SMS habarlamalarǵa nazar aýdarý qajet», deıdi A.Dosjanov.
Árbir kólikte mindetti túrde oqys oqıǵa oryn alsa, eń qajetti zattar bolýy kerek. Olar: dánekerleý shamdary, kabelder, dońǵalaq tizbekteri, kúrekter, parafındi shamdar, sonymen birge jyly kıim, qajetti zattar, azyq-túlik pen sý qory. Qatty aıaz nemese qar jaýǵan kezde birneshe kólikpen birigip toptasý kerek, tótenshe jaǵdaı oryn alsa basqa júrgizýshiler kómekke kele alady. Mamandar qarly boranǵa túsip kóligińiz toqtap qalsa, «112» nómiri boıynsha kómek shaqyrý qajet ekenin eskertýde.
Jetisý oblysy