Áıgili ESPN arnasy aralas jekpe-jek ónerin serik etken 25 jasqa deıingi sportshylardyń arasynan úzdikterdi anyqtap, solardyń reıtıngin jarııalady.
Úzdikter tizimine jeńil salmaqtaǵy Qaısar Maqsat ta endi. Myqtylar sanatynda ol 11-orynda tur. Qytaıda týyp-ósken qandasymyz óziniń tusaýkeser kezdesýin 2019 jyldyń tamyz aıynda M-1 Global promoýsheninde ótkizdi. О́kinishke qaraı, sol jarysta Qaısar reseılik Nıkolaı Goncharovqa upaı sanymen utyldy. Esesine odan keıingi ýaqytta WLF-W.A.R. uıymynyń muryndyq bolýymen ótken birqatar týrnırde qatarynan bes ret jeńiske jetip, Dana Ýaıttyń prezıdenttik serııasy dodasynda kúsh synasý qurmetine ıe boldy. Sol jekpe-jekte kanadalyq Ahılles Estremadýrany qapy qaldyrdy. Osy jeńisiniń arqasynda qazaq sportshysy UFC-men kelisimshartqa otyrdy. Álemniń eń beldi promoýshenindegi alǵashqy kezdesýin Qaısar Maqsat bıyl jazda amerıkalyq Stıv Garsııaǵa qarsy ótkizip, ony birinshi raýnda esinen tandyrdy.
ESPN-niń reıtınginde daǵystandyq Ýsman Nurmagomedov kósh bastap tur. Amerıkalyq Erın Blanchfıld pen Muhammad Mokaev ekinshi jáne úshinshi oryndardy ózara bólisken. Sondaı-aq úzdik bestiktiń qatarynda ekvadorlyq Maıkl Morales pen Meısı Barber syndy sportshylar bar.