Para-hokkeıden Qazaqstannyń jalǵyz quramasy para-hokkeıden (sledj-hokkeı) S pýlyndaǵy álem chempıonatynda sátti óner kórsetip, V tobyna ótip, ekinshi orynǵa ıe boldy, dep habarlaıdy Egemen.kz.
Týrnırge Qazaqstan, Taıland, Avstrııa, Ulybrıtanııa jáne Fransııa komandalary qatysty. Otandyq parasportshylar mundaı joǵary halyqaralyq deńgeıdegi jarysqa alǵash ret qatysyp otyr. Debıýttik týrnırde sportshylar tórt matchtyń úsheýinde jeńiske jetti (7:0, 10:0 jáne 9:2) jáne týrnır kestesinde ekinshi orynǵa taban tiredi. Tek Ulybrıtanııaǵa (0:6) ese jiberip aldy. Paralımpıada oıyndarynyń chempıonatyn uıymdastyrýshylar qazaqstandyq quramanyń oıynyna tánti bolyp, 2 orynǵa qaramastan, 2023 jyly V tobynda ótetin kelesi chempıonatta óner kórsetýine joldama berdi.
«Qazaqstan halqyna» qoǵamdyq qorynyń qaıyrymdylyq jobasy aıasynda qazaqstandyq quramaǵa para-hokkeıden halyqaralyq jarystarǵa daıyndalýy jáne qatysýy úshin sporttyq múkámmal satyp alyp berdi. Joba Qazaqstan Respýblıkasynda paralımpıadalyq hokkeıdi damytýǵa jáne qoldaýǵa baǵyttalǵan.
Álem chempıonatynda parasportshylar qor tabys etken 50 dana syrǵytpa taıaqpen óner kórsetti. Sondaı-aq quramaǵa 16 shana jetkiziledi dep kútilýde. Bul maqsatqa «Qazaqstan halqyna» qory 12,4 mıllıon teńge baǵyttady.
«Para-hokkeı federasııasy 2021 jyly quryldy. Bastamashylar múmkindigi shekteýli, tirek-qımyl júıeleri buzylǵan azamattar. Maqsatymyz – aıaq ampýtasııasy nemese kez kelgen basqa dıagnozy bar, qıyn ómirlik jaǵdaıǵa tap bolǵan adamdarǵa kómektesý. Mysaly, sportshylar arasynda aıaǵynan aıyrylǵan kásibı fýtbolshylar bar. Para-hokkeıge kelip, jańa ómirdi bastap, úmitke qol jetkizdi deýge bolady. Komandamyzda 18 adam, sonyń ishinde bir qyz jáne eki jattyqtyrýshy bar. Eń jasy 17-de, úlkeni 57 jasta. Qorjynymyzda jeńisterimiz de bar», dedi Astana qalasy para-hokkeı federasııasynyń basshysy Qaırat Sabyrov.
Buǵan deıin parasportshylar túrli jarystarǵa qatysyp, jetistikterge qol jetkizgen. Bıyl qurama Ombyda ótken «Sibir Kýbogy» halyqaralyq týrnırinde kúmis, Hanty-Mansııskidegi «Birgemiz. Sport» paralımpıadashylardyń Qysqy oıyndarynda qola medal jeńip aldy. О́tken jyly Sochıdegi «KHL Kontınent Kýbogy» hokkeıden halyqaralyq týrnırde tórtinshi oryndy ıemdendi. Qalypty qyzmet merzimi nebári 5 jyl bolsa da, bul jarystarda 2017 jyly satyp alynǵan jabdyqtar qoldanylyp keldi. Sondyqtan Astana qalasynyń para-hokkeı federasııasy «Qazaqstan halqyna» qoryna júginip, múmkindigi shekteýli jandarǵa qoldaý kórsetip, hokkeıge arnalǵan shana men syrǵytpa taıaq satyp alýǵa kómek surady.
«Para-hokkeı – paralımpıadalyq sport túri jáne biz onyń Qazaqstandaǵy damý múmkindikterin baıqap otyrmyz. Jigitterimizdiń qarqyny erekshe, jeńýge daıyn. Osy ýaqyt ishinde para-hokkeımen aınalysqysy keletin jankúıerlerimiz ben pikirles jandardy taptyq. «Qazaqstan halqyna» qory usynysymyzǵa jaýap berip, múgedek sportshylardy qoldaǵanyna rızamyz. Bul biz úshin kúshti motıvasııa, ynta-jigerimizdi odan ary arttyra tústi», dedi Qaırat Sabyrov.
Para-hokkeıden álem chempıonatynyń kúmis medali elimizdegi osy sport túriniń deńgeıin kóterýge, óńirlerdegi parasportty buqaralyq jáne tanymal etýge, sondaı-aq múgedek adamdardyń nazaryn sportqa aýdarýǵa múmkindik beretinine parasportshylar senimdi. Sebebi aımaqtarda múmkindigi shekteýli jandarǵa arnalǵan mamandandyrylǵan muz saraılarynyń bolmaýyna baılanysty para-hokkeı jetkilikti damymaǵan. Erekshe qajettilikteri bar adamdarǵa arnalǵan jalǵyz muz saraıy Astanada «Tarlan» sport kesheninde ornalasqan.