Kómek kerýeni

Shyǵysqazaqstandyqtar sý tasqynynan zardap shekken Reseıdiń Altaı aımaǵyna gýmanıtarlyq kómek jiberdi. Altaı aımaǵynyń gýbernatory Aleksandr Karlın­ge óńir jurtshylyǵy atynan aımaq basshysy Berdibek Saparbaev qaza bolǵan adamdar úshin kóńil aıtyp, gýmanıtarlyq kómek jiberilgenin jetkizdi. Shyǵys jurty úshin tabıǵattyń tosyn jaǵdaıy erteden tanys. О́ńir turǵyndary osydan tórt jyl buryn oryn alǵan tabıǵı apatty umyta qoıǵan joq. Qalyń túsken qar, kúrt jylyǵan kún, erigen qar sýy men oǵan qosa jaýǵan jańbyr sol kezde shyǵysqazaqstandyqtardy ábden ábigerge salǵan. Birqatar eldi mekender qarǵyn sýdyń astynda qalǵan kezde qalyń eldiń qoldaýyna súıengen shyǵysqazaqstandyqtar qaıyrymdylyq kómektiń qıyn-qystaý kezde qanshalyqty demeý ekenin jaqsy biledi. – Jaqynyńa kómektesý – óte saýapty is. Bizdiń janymyzda óte meıirimdi adamdar ómir súrip jatyr. Shyǵys Qazaqstan oblysy árdaıym tabıǵı jaǵdaıdan zardap shekken aýdandarǵa qolushyn sozyp, kómek kórsetip keledi. Sý tasqyny bolyp, basymyzǵa aýyrtpalyq túsken sátte bizge de kómek kelgen bolatyn, – dep eske alady gýmanıtarlyq kómekti jınaýǵa qatysýshylardyń biri Natalıa Shımolına. Altaı aımaǵyna kómek kórsetýge kóp­tegen aýdandar úles qosty. Bir ǵana Shemo­naıha aýdany un, qaraqumyq, asburshaq, arpa syndy 20 tonna azyq-túlik qoryn jınap berdi. Zyrıan aýdanynyń eriktileri 2 mıllıon teńgeden astam gýmanıtarlyq kómek kórsetti. Al borodýlıhalyqtar 100 dana jyly jamylǵy, 100 dana jastyq, 100 dana kıim ázirledi. Dýman ANASh, «Egemen Qazaqstan». О́SKEMEN.