Senator Amangeldi Tolamısov elimizdiń Premer-Mınıstriniń atyna joldaǵan depýtattyq saýalynda býkmekerlik keńseler jarnamasynyń kóbeıip ketkenin aıtty, dep habarlaıdy Egemen.kz.
Depýtat bul másele Parlament qabyrǵasynda birneshe ret kóterilgenine nazar aýdardy. «Oıyn bıznesi týraly» zańda elektrondy kazınolar men ınternet-kazıno qyzmetterine tyıym salynǵan, al «Jarnama týraly» zańda mundaı kazınolar men olardyń qyzmetterine jarnama jasaýǵa tyıym salynǵan. Biraq, depýtattyń aıtýynsha, qazir zańnamaǵa osyndaı jarnama úshin jaýapkershilikti kúsheıtetin normalardy engizý mańyzdy.
«Oıyn bıznesi úlken qarjynyń kózi bolǵandyqtan ba, álde tıisti dárejedegi baqylaý men qadaǵalaýdyń joqtyǵynan ba oǵan is júzinde tyıym salý áli kúnge deıin múmkin bolmaı tur. Oıyn avtomattary kez kelgen jerge qoıylǵan, stavka qabyldaý pýnkteri erkin jumys isteıdi. Jarnamalyq seriktesteri de kóbine býkmekerlik kompanııalardy jarnamalap kún kórip otyrǵandyqtan odan bas tartpasy anyq. Biraq belgili bir deńgeıde toqtaý salmasa, qoǵamdaǵy jaǵdaı ýshyǵyp barady», dep atap ótti senator.
Senator aıtqan derekter boıynsha qazir elimizde oıyn bıznesi salasynda jumys isteýge lısenzııasy bar 50 uıym bar, onyń ishinde 26 býkmekerlik keńse, 6 kazıno, oıyn avtomaty qoıylǵan 10 zal, 2500-ge jýyq bás tigý pýnktteri jáne 8 totalızator jumys isteıdi.