Qazaqstan Respýblıkasy Prezıdentiniń Jarlyǵyna sáıkes áskerı jáne qyzmettik boryshyn oryndaý kezinde kórsetken batyldyǵy men janqııarlyǵy, eldiń ulttyq qaýipsizdigi men qorǵanys qabiletin nyǵaıtýǵa qosqan úlesi úshin Almaty oblysy Tótenshe jaǵdaılar departamenti órt sóndirý jáne avarııalyq-qutqarý jumystary qyzmeti 2 mamandandyrylǵan órt sóndirý bóliminiń bólimshe komandıri Nurmetov Renat Nurmaǵameduly «Erligi úshin» medalimen nagradtaldy, dep habarlaıdy Egemen.kz.
Táýelsizdik kúni qarsańynda Qazaqstan Respýblıkasynyń Tótenshe jaǵdaılar mınıstri Iýrıı Ilın órt sóndirýshige memlekettik nagradany tabys etti.
Eske sala keteıik, 2021 jylǵy 5 tamyzda «101» nómirine Talǵar aýdany, Talǵar qalasy, Rysqulov kóshesi, 66-úı mekenjaıyndaǵy 4 qabatty úıde tútin shyqqany týraly habarlama kelip tústi.
Oqıǵa ornyna kelgen kezde páterdiń ashyq jalynmen janyp jatqany anyqtaldy. Turǵyndar úıdiń ishinde adamdar bolýy múmkin ekendigin aıtty.
Nurmetov Renat Nurmaǵameduly gaz-tútinnen qorǵaý qyzmetiniń býynyn basqaryp, páterge kirip, órt oshaǵyn sóndire bastady. Barlaý júrgizý barysynda Renat Nurmetov adamdardy qaýipsiz jerge evakýasııalady jáne turǵyn úı-jaılarǵa ottyń taralý qaýpin boldyrmady, sondaı-aq joǵarǵy qabattardan 9 adamdy, onyń ishinde 6 balany qutqardy.
Renat Nurmetovtiń sheber is-áreketiniń arqasynda adamdar qutqarylyp, órt ýaqtyly sóndirildi.