Asqaraly asýlardan asamyz

Keshe Ortalyq kommýnıkasııalar qyzmetinde Parlament Májilisiniń depýtaty, Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev eýrazııalyq ıntegrasııa taqyrybyna arnap brıfıng ótkizdi. Astanada tarıhı qujatqa qol qoıylǵannan beri kún qurǵamastan onyń máni men elimiz úshin qandaı mańyzy barlyǵyn zerdelegen brıfıngter birinen soń biri ótip jatyr. Keshe brıfıngte kezek M.Áshimbaevtyń salmaqty oılaryna kelgen. «EAEO-ǵa baǵa bergende, biz oǵan jahandyq turǵydan qaraýymyz kerek. Qazirgi zamanda ashyqtyq, álem elderimen áriptestik jahandyq trend bolyp sanalady. Barlyq memleket bir-birimen qarym-qatynas ornata otyryp, damýdy kózdeıdi, al ózin ózi oqshaýlap, saýda-ekonomıkalyq qatynastardyń ózine esigin tars jaýyp alǵan elder álemde saýsaqpen sanarlyq bolar. Al munyń tuıyqqa aparatyn jol ekenine daý joq. Eger biz 23 jyl ishindegi Qazaqstannyń barlyq jetistikterin oı tarazy­syna salyp, saraptap shyqsaq, onda onyń barlyq salalardaǵy tabysy – ashyqtyq saıasatyn ustanýdyń jemisi ekenin kóre­miz», –degen depýtat ári qaraı biz óz elimizdiń memlekettik she­ka­rasynyń quqyqtyq resimdelýin tolyq aıaqtaǵanymyz úshin maq­ta­natynymyzdy kóldeneń tartty. Elimizdiń osy ashyqtyqty tý etken saıasatynyń arqasynda kórshilermen únqatysyp, týyn­daǵan máselelerdi eńserý úshin kelissózder júrgize otyryp, aradaǵy shekara túıtkilin tolyq­taı sheshtik, ekonomıkalyq turǵyda da elimiz qol jetkizgen tabystar taǵy da sol ashyqtyqtyń kómegimen júzege asyrylyp, 180 mlrd. dollardan astam ınvestısııa tartyldy, degen depýtat sondyqtan da, Qazaqstan bolashaǵy jahandyq ekonomıkamen ıntegrasııaǵa jáne jahandyq qaýipsizdik boıynsha ıntegrasııaǵa baılanysty ekenin atap kórsetti. Bizdiń EAEO-ny qurýymyzdy osy turǵydan qarastyrý kerek. Bul Odaq bizge jahandanǵan álemmen barynsha tabysty yntymaqtasý úshin, onyń quramdas bir bóligi bolý úshin qajet, dedi ol. «Aldymen bul Odaq, Elbasy atap ótkendeı, tek ekonomıkalyq turǵyda júrgizilip, el táýel­sizdigine esh nuqsan keltirmeıtini basty qaǵıda bolyp qala beredi», dep ekonomıkalyq pragmatızm qaǵıdasyna toqtaldy depýtat. Elder naqty ekonomıkalyq múd­dege saı ıntegrasııalanady. Bul – eshqandaı da ózge saıa­sı múddeler emes, tek qana ekonomıkalyq qarym-qatynas. Basty qaǵıda – ıntegrasııalanýshy elderdiń teńdigi jáne teń quqylyǵy. EAEO-daǵy barlyq úderister qatysýshylar úshin tıimdi bolyp, ekonomıkalyq baılanystardyń óristegeninen paıda túsirýi tıis. Al osy qaǵıdattardy basty usta­nym etken úsh Memleket bas­shy­synyń Astanada mańyzdy qu­jat­qa qol qoıǵany barshaǵa málim. Sonymen qatar, M.Áshimbaev kóp vektorly saıasattyń memleket úshin mańyzyn joımaıtynyn alǵa tartty. Bizdiń EAEO-ǵa qol qoıýymyzdyń osyǵan deıin­gi shartarappen qarym-qatynastarymyzǵa esh kedergisi joq. Osylaı dep elimizdiń syrt­qy saıasattaǵy vektorlaryn saralaǵan depýtat birneshe baǵyt­taǵy baılanystarǵa toqtalyp ótti. Máselen, Qytaı bizdiń árip­tesimiz boldy jáne bola beredi, eki aradaǵy saýda aınalymy 24 mlrd. dollar shamasynda, jyl saıyn biz ol elge 11 mln. tonna munaı jóneltemiz, dep ózge de salalarda áriptestiktiń tabysty júrýde ekendigin jýrnalıster qaperine saldy. M.Áshimbaev, sondaı-aq, bizdiń elimiz úshin Eýropa odaǵynyń mańyzdy saıa­sı ári ekonomıkalyq áriptes retindegi ornynyń eshqashan olqy soqpaıtynyn da aıtyp ótti. Muhıttyń ar jaǵyndaǵy mem­leketter, onyń ishinde AQSh-tyń da mańyzdy árip­tes bolyp qala beretinin, amerı­kalyq kompanııalardyń el ekonomıkasynyń túrli salalarynda jemisti eńbek etýiniń paıdalylyǵyn, qaýip­sizdik máselelerinde de yntymaq­tastyqtyń óristep otyrǵanyn, sonymen qatar, jeke memlekettermen ǵana emes, elimizdiń halyqaralyq uıymdarmen de áriptestigin áńgimeledi. Onyń aıtýynsha, Shanhaı yntymaqtastyq uıymy, ASEAN, EQYU boıynsha da yntymaqtasqan qadamdardyń qarqyny óristeı bermek, buǵan qosa, ol AО́SShK áleýetin kári qurlyqtaǵy EQYU syndy uıymmen parapar etýdiń múm­kindigi barlyǵyn da ortaǵa saldy. EAEO, túptep kelgende, «Qazaqstan-2050» Strate­gııa­synda qoıylǵan asqaraly asýlardan asýǵa jol ashady, bul rette elimiz ustanǵan ishki jáne syrtqy saıasattyń jemisti bolatynyna esh kúmán joq, degen depýtat brıfıng sońynda jýrnalıster qoıǵan saýaldarǵa jaýap berdi. Anar TО́LEÝHANQYZY, «Egemen Qazaqstan».