Almatyǵa jumys sapary barysynda Mádenıet jáne sport mınıstri Dáýren Abaev «Aýyl» fılminiń kórsetilimine bardy, dep habarlaıdy Egemen.kz MSM baspasóz qyzmetine silteme jasap.
Belgili rejısser Serik Aprymovtyń jumysy XVI Halyqaralyq «Eýrazııa» kınofestıvaliniń Ulttyq baıqaýyna qatysyp jatyr.
Aıta keteıik, qazaqstandyq jas rejısserler tuńǵysh ret «Eýrazııa» kınofestıvaliniń marapattaryna Ulttyq baıqaý aıasynda ıe bolýǵa múmkindik aldy. Jalpy, kınofestıvaldiń túrli baǵdarlamalaryna 50-ge jýyq otandyq jáne sheteldik fılmder qatysty.
Ulttyq baıqaýǵa «Aqyn» (rej. Dárejan О́mirbaev), «Shema» (rej. Farhat Sháripov), «Dos-Muqasan» (rej. Aıdyn Sahaman) jáne basqa fılmder usynylǵan. Halyqaralyq baıqaýda «Mármár tastaı sýyq»(Ázirbaıjan-Fransııa; rej. Asıf Rýstamov), «Eshqaıda aparmaıtyn jol»(О́zbekstan; rej. Kamara Kamalova) jáne «Qudaıdyń shaqyrýy» (Estonııa – Latvııa – Qyrǵyzstan; rej. Kım Kı Dýk) jáne basqa fılm rejısserleri baq synaıdy.
Eki baıqaýda da jeńimpazdar kelesi bes nomınasııa boıynsha marapattalady: Úzdik fılm, Úzdik rejısserlik jumys, Úzdik erler róli, Úzdik áıelder róli jáne qazylar alqasynyń arnaıy júldesi.
Kınofestıval aıasynda túrli kezdesýler, dóńgelek ústelder men prezentasııalar ótti. Onda sala ókilderi qazaqstandyq kınematograftyń ózekti máselelerin talqylady, keıin qatysýshylar men sala sarapshylary úshin Work-In-Progress baǵdarlamasy uıymdastyryldy.
Aıta keteıik, búgin, 18 jeltoqsanda festıval jeńimpazdarynyń esimi belgili bolady. 15:00-de qonaqtar men qatysýshylar qyzyl kilem arqyly júrip ótse, 16:00-de marapattaý rásimi bastalady.
«Eýrazııa festıvaline myqty fılmder usynylǵan. Búgin qazylar alqasy úzdikterdi anyqtaıtyn bolady. Qatysýshylarǵa sáttilik tileımin», dedi Dáýren Abaev.