Keıingi bir jyl ishinde eldegi shaǵyn bıznes kásiporyndarynyń sany 10 paıyzǵa kóbeıgen. Solardyń shıreginen astamy saýda jáne avtojóndeý salasyndaǵy kásip nysandary eken. 2022 jyldyń qarashasynyń basyndaǵy jaǵdaı boıynsha elde 496,3 myń shaǵyn kásiporyn tirkelgen. Bul – byltyrǵymen salystyrǵanda 5,4 paıyzǵa joǵary kórsetkish. Sonyń ishinde shynymen jumys istep turǵan kásiporyn sany 379 myń. Bul turǵydan da 2021 jyldyń qazanymen salystyrǵanda 11,4 paıyzǵa ilgerileý bar.
Finprom málimeti boıynsha joıylý prosesin bastan keship jatqan shaǵyn kásiporyn sany úshinshi jyl qatarynan qysqaryp keledi. Olardyń úlesi bıyl 5,2 myń. Byltyrǵymen salystyrǵanda 3,4 paıyzǵa tómen.
«Bir jylda belsendi shaǵyn kásiporyn sany birden 10,2 paıyzǵa ulǵaıyp, 2022 jyly qazannyń sońynda 181,5 myń boldy. Bul rette olardyń jumys istep turǵan shaǵyn kásiporyndardaǵy úlesi tórtinshi jyl qatarynan tómendep, sońǵy bir jylda 48,4 paıyzdan 47,9 paıyzǵa deıin azaıdy», deıdi sarapshylar.
Belsendi shaǵyn kásiporyndardyń kóbi Almaty (47 myń), Astana (30,9 myń) qalalarynda jáne Qaraǵandy oblysynda (9,8 myń) shoǵyrlanǵan. Barlyq belsendi shaǵyn bıznes sýbektisiniń tórtten biri avtomobılder men motosıklderdi saýdalaý jáne jóndeý salasynda jumys isteıdi: 45,2 myń kompanııa 2021 jyldyń qazan aıymen salystyrǵanda 13,8 paıyzǵa artyq. Sondaı-aq bilim berý (17,1 myń kásiporyn), qurylys (15,5 myń) jáne kásiptik, ǵylymı-tehnıkalyq qyzmet (14,2 myń) salalarynda da belsendi kompanııalar barshylyq.
О́tken jylmen salystyrǵanda aıtarlyqtaı ósim saýda jáne avtojóndeý salasynda baıqaldy: 5,5 myń belsendi shaǵyn kásiporyn. Sonymen qatar qurylys salasynda mundaı kompanııalardyń sany 287-ge ǵana azaıǵan.
Ranking derekterine súıensek, sońǵy bir jyl kóleminde jumys istep turǵan jeke kásipkerlik (JK) sany da 26 paıyzǵa artqan.
«Bıyl 1 qarashada elde tirkelgen 1,5 mln jeke kásipkerlik sýbektisi boldy. Byltyrǵymen salystyrǵanda 20,4 paıyzǵa kóp. Olardyń 92,2 paıyzyn (1,4 mln) jumys istep turǵan JK-lar qurady: Jyldyq ósim – 25,6 paıyz. Bul – keıingi jyldary tirkelgen aıtarlyqtaı joǵary kórsetkish», delinedi zertteýde.
Belsendi JK-niń kóbi Almaty qalasynda (184,3 myń, + 53,8 paıyz), Túrkistan oblysynda (163,7 myń, +21,9 paıyz) jáne Astanada (130,6 myń, +27,5 paıyz) jumys isteıdi. Eń azy – Ulytaý, Soltústik Qazaqstan jáne Pavlodar oblystarynda.
«Qoldanystaǵy JK-niń úshten birinen astamy saýda jáne avtojóndeý salasynda jumys istegen (505,3 myń, +40,6 paıyz). Jeke kásipkerlerdi jumyspen qamtýdyń negizgi úsh sektoryna, sonymen qatar aýyl, orman jáne balyq sharýashylyǵy (245,2 myń, +0,9 paıyz) jáne jyljymaıtyn múlikpen operasııalar (72,5 myń, +11,6 paıyz) kirdi. Memlekettik basqarý, qorǵanys jáne mindetti áleýmettik qamtamasyz etý salalarynda da JK sany aıtarlyqtaı ósti», deıdi sarapshylar.