Astanadaǵy Tarıhı-mádenı mura obektilerin jáne eskertkishterdi saqtaýdy qamtamasyz etý ortalyǵynyń kórme zalynda jas sýretshi Ardaq Qudaıbergenovanyń « Kózimniń qarasy – Uly dala» atty kórmesi ótti. Atalǵan is-shara Táýelsizdik kúnine arnaldy.
Kórmege sýretshiniń keıingi jyldary salǵan birqatar týyndysy qoıyldy. Ásirese onyń shyǵarmalarynda tabıǵattyń ǵajaıyp sulýlyǵy shynaıylyǵymen aıshyqty beınelengen. Ony jas sheberdiń názik sezimmen órnektegen kartınalarynan anyq baıqaısyz.
«Bala kúnimnen beıneleý ónerine yntyq bolyp, ózim qyzyǵyp kóretin mýltfılm keıipkerlerin salǵandy jaqsy kórdim. Eseıe kele tabıǵat kórinisterin aq paraqqa túsire bastadym. Negizi, meniń balalyq shaǵym aýylda ótti. Ata-ájemniń qolynda óstim. Qazir sol aýyl, ata-ájemniń beınesi, balalyq shaq kórinisteri kóz aldymnan keter emes. Sol saǵynyshymdy sýret arqyly jetkizgim keldi. Sondyqtan kórmemdi «Kózimniń qarasy – Uly dala» dep atadym», dedi jas sýretshi.
Ardaq Qudaıbergenova – keıingi jas býyn sýretshiler arasynan óz qoltańbasymen tanylǵan talant ıesi. Birqatar halyqaralyq jáne respýblıkalyq baıqaýdyń laýreaty. Sonyń ishinde «Golden time talent» kórkemsýret baıqaýy men «Dali»S Mustache» festıvaliniń júldegeri atanǵan.