Búgin, ıaǵnı 19 jeltoqsanda elordada EXPO kórme kesheniniń alańynda elimizdiń basty shyrshasyn jaǵý rásimi ótti, dep habarlaıdy Egemen.kz Astana ákimdiginiń resmı saıtyna silteme jasap.
Shyrshanyń bıiktigi — 25 metr. Ol júzdegen shamshyraqpen bezendirilgen. Merekeniń basty atrıbýtyn bezendirýde 750 metr gırlıand, 360 birlik jaryqsham jáne 900-den astam shyrsha shary qoldanyldy.
Shyrshany jaǵý rásimi bastalar aldynda elorda turǵyndary men qonaqtaryna «Ǵajaıyptar túni» ertegi muz shoýy kórsetildi. Elimizdiń basty shyrshasyn búldirshinder, elorda ákimi Jeńis Qasymbek, Aıaz Ata men Aqshaqar birlese jaǵyp, sahnada qazaqstandyq ártister jáne t.b. óner kórsetti.
«Qurmetti elordamyzdyń turǵyndary men qonaqtary, jańa jyl qarsańynda sizderge merekelik kóńil-kúı, qýanysh, otbasylaryńyzǵa zor densaýlyq tileımin! Astanamyz damyp, órkendeı bersin! Aldaǵy jyl qala úshin berekeli bolsyn! Búgin jańa jyl merekesin bastaǵaly otyrmyz. Mundaı is-sharalar áli de kóp bolady. Qalamyzdyń barlyq aýdanynda muz aıdyndary men syrǵanaqtar ornatylyp jatyr, onda árbir adam bos ýaqytyn kóńildi ótkize alady», dedi Astana ákimi Jeńis Qasymbek.
Is-shara Astana Muz Fest aýqymdy qysqy festıvali aıasynda ótkizildi. Búgin muz aıdyndary, slaıdtar, jańa jyldyq jármeńke jáne t.b. bar qysqy qala óz jumysyn bastady.