Senattyń Ekonomıkalyq saıasat, ınnovasııalyq damý jáne kásipkerlik komıtetiniń depýtattary keńeıtilgen otyrysta birqatar zań jobasyn talqylady, dep habarlaıdy Egemen.kz Senattyń baspasóz qyzmetine silteme jasap.
Solardyń biri «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy azamattyq áýe kemelerin avıasııalyq izdestirý jáne qutqarý salasyndaǵy yntymaqtastyq týraly kelisimdi ratıfıkasııalaý týraly» zań jobasy apatqa ushyraǵan ushaqtardyń jolaýshylary men ekıpajdaryn izdeý jáne qutqarýdaǵy memleketter arasyndaǵy yntymaqtastyqty odan ári kúsheıtýge baǵyttalyp otyr.
«Zań jobasynyń maqsaty – halyqaralyq azamattyq avıasııa uıymy usynǵan standarttar men tájirıbesi boıynsha apatqa ushyraǵan áýe kemeleriniń jolaýshylary men ekıpajyn izdeý. Sonymen qatar memleketterdiń izdestirý-qutqarý qyzmetteri arasyndaǵy yntymaqtastyqty nyǵaıtý, sondaı-aq eki taraptyń izdestirý-qutqarý qyzmetteriniń birlesken oqý-jattyǵýlaryn ótkizý, tájirıbe jáne aqparat almasý kózdelip otyr», dep atap ótti senator Súıindik Aldashev.
Senatorlar «Qazaqstan Respýblıkasynyń Úkimeti men Shveısarııa Konfederasııasynyń Federaldyq Keńesi arasyndaǵy baǵaly metaldardan jasalǵan buıymdardaǵy synamalyq tańbany ózara taný jónindegi kelisimdi ratıfıkasııalaý týraly» zań jobasyn da qarady. Zań jobasynyń erejeleri elder arasyndaǵy yntymaqtastyqty jeńildetý úshin baǵaly metaldardan jasalǵan buıymdardaǵy synama tańbasyn ózara tanýdy kózdeıdi.
Depýtattar sonymen qatar aglomerasııalardy qalyptastyrý jáne damytý úshin quqyqtyq jaǵdaılar jasaýǵa baǵyttalǵan «Aglomerasııalardy damytý týraly» jáne «Qazaqstan Respýblıkasynyń keıbir zańnamalyq aktilerine aglomerasııalardy damytý máseleleri boıynsha ózgerister men tolyqtyrýlar engizý týraly» zań jobalaryn da talqylady. Zań jobalarynyń ereksheligi aglomerasııaǵa kiretin eldi mekenderdiń áleýmettik-ekonomıkalyq damýynyń qazirgi jaı-kúıin, qalalyq jáne keńistikti josparlaý, kommýnaldyq, kóliktik jáne áleýmettik ınfraqurylymdy damytý problemalaryn baǵalaý qamtylatyn keshendi damý josparyn ázirleý bolyp tabylady. Zań jobalarynyń erejeleri óńirlik jáne respýblıkalyq deńgeıdegi aglomerasııalar boıynsha keńester qurýdy da kózdeıdi.
Komıtettiń keńeıtilgen otyrysynyń qorytyndysy boıynsha osy zań jobalaryn Palatanyń qaraýyna jiberý týraly sheshim qabyldandy.