О́zbekstannyń beıneleý óneri galereıasynda aqyn Abaıdyń ómiri men shyǵarmashylyǵyna arnalǵan «Abaı. Baýyrlas halyqtardyń murasy» atty kórme ashyldy. Rýhanı is-sharanyń ashylý saltanatyna О́zbekstan Premer-mınıstriniń orynbasary, Týrızm jáne mádenı mura mınıstri Ázız Ábdihaqymov, Qazaqstannyń Mádenıet jáne sport mınıstri Dáýren Abaev, Qazaqstannyń О́zbekstandaǵy Tótenshe jáne ókiletti elshisi Beıbit Atamqulov, «Jıdebaı-Bórili» Abaı mýzeıiniń dırektory Turdyqul Shanbaı, Beıneleý óneri galereıasynyń dırektory Kamola Akılova jáne zııaly qaýym ókilderi qatysty. Sondaı-aq Tashkent qalasynda Abaı Qunanbaıuly eskertkishine gúl shoqtaryn qoıý rásimi ótti.
Qazaqstannyń Mádenıet jáne sport mınıstri Dáýren Abaev kórme jumysyn uıymdastyrǵany úshin kórshiles el tarapyna alǵys aıtty.
«Álisher Naýaı men Abaıdyń shyǵarmashylyǵy – jalpy adamzat qundylyqtarynyń qalyptasý úlgisin beıneleıtin uly mura. Eki oıshyl ártúrli ýaqytta ómir súrse de, olardy gýmanızmge degen umtylys pen poezııadaǵy reformatorlyq rýh biriktiredi. Ekeýi de baýyrlas halyqtyń rýhanı tiregi», dedi mınıstr.
Al О́zbekstan Premer-mınıstriniń orynbasary, Týrızm jáne mádenı mura mınıstri Ázız Ábdihaqymov qazirgi ýaqytta túrki halyqtarynyń mádenı jádigerlerin saqtaý jáne qalpyna keltirý boıynsha úlken jumystar júrgizilip jatqanyn atap ótti.
«Qazaqtyń úlken oıshyly Abaıdyń shyǵarmashylyǵyna arnalǵan kórmeniń ashylýy – О́zbekstan men Qazaqstan arasyndaǵy dostyqtyń nyǵaıyp kele jatqanyn aıǵaqtaıdy. Osy múmkindikti paıdalana otyryp, Qazaqstannyń Mádenıet jáne sport mınıstri Dáýren Abaevqa «О́zbekstanǵa qosh keldińiz» dep aıtqym keledi. Búgin ashylǵan kórme uly oıshyl Álisher Naýaıdiń gýmanıstik dástúrlerin saqtaǵan Abaı shyǵarmashylyǵyn jaqsy túsinýge múmkindik beretinine senimdimiz. Onyń shyǵys pen batystyń birligi týraly, álemdik murany ıgerý qajettiligi, ensıklopedızmge umtylý, adam tabıǵatyn jetildirý týraly ıdeıalary qazirgi kezeńde de ózektiligin joǵaltqan joq», dedi Ázız Ábdihaqymov.
Baýyrlas elde ashylǵan kórme «Kóshpeli mádenıet Abaıdyń qalyptasýynyń negizgi faktory retinde», «Álisher Naýaıdiń Abaıdy qalyptastyrýdaǵy rýhanı tálimger retindegi róli», «Abaı ómiriniń negizgi kezeńderi», «Sýretshiler Á.Qasteev, O.Tańsyqbaev, E.Sıdorkın, N.О́tepbaev jáne t.b. shyǵarmalaryndaǵy Abaı keıipkerleri men sıýjetteri» atty bólimderden turady. Onda qazaqtyń dástúrli turmysy, sándik-qoldanbaly óneri, keskindeme, grafıka, Abaı týraly basylymdar, onyń shyǵarmalary usynylǵan.
Aıta keteıik, «Abaı. Baýyrlas halyqtardyń murasy» kórmesi Tashkent qalasynda 19-30 jeltoqsan kúnderi aralyǵynda ótedi.