Berik otbasy – berekeli qoǵam

Ulttyq komıssııa tóraǵasynyń orynbasary, Parlament Senatynyń depýtaty Lázzat Súleımenniń aıtýynsha, eldegi kúrdeli áleýmettik máselelerdi sheshýdiń tıimdiligin arttyrýǵa jáne azamattyq qoǵammen ózara is-qımyldy keńeıtýge baǵyt­tal­ǵan birshama jumys atqaryldy. Árbir basymdyq boıynsha saraptamalyq toptar quryldy, jańa tásilder qa­byl­dandy, komıssııanyń jumysyn retke keltiretin, sektorlardyń ju­my­syn jáne onyń músheleriniń qyz­me­tin baǵalaýdy aıqyndaıtyn reglament bekitildi.

«Balalar jyly balalardyń qu­qyq­tary men múddelerin qorǵaý máse­lesi basty nazarda boldy. Osy maqsatta arnaıy jospar ázirlenip, onda 65 júıeli is-shara qamtyldy. Kúrdeli áleýmettik máseleler bo­ıynsha 18 óńirge ulttyq komıssııanyń monı­torıngtik tobynyń sapary uıym­das­tyryldy. Olar per­zent­ha­nalarǵa, perınataldyq orta­lyqtarǵa baryp, qatardaǵy dári­gerlermen jáne bosanatyn áıel­der­diń ózimen tikeleı baılanys ornatyp, óńirlerde ana men bala óliminiń ósý sebepterin egjeı-tegjeıli zerttedi. Bul ju­mys­qa akýsherlik, gınekologııa jáne perınatologııa salasyndaǵy sarap­shy­lar, elimizdiń medısınalyq jo­ǵary oqý oryndarynyń belgili ǵa­lym­­dary tartyldy», dedi spıker.

Onyń aıtýynsha, balalardy zorlyq-zombylyqtan qorǵaý sýısıdtiń aldyn alý jáne balalardyń qu­qyqtary men ál-aýqatyn qamta­masyz etýdiń 2023-2025 jyldarǵa ar­na­lǵan keshendi jospary ázirlendi. Balalarǵa qatysty zorlyq-zombylyq faktileri boıynsha jedel áreket etý algorıtmi jasaldy. Algorıtm ne­gizinde vedomstvoaralyq den qoıý júıesin kúsheıtýge múmkindik bere­tin jáne jergilikti jerlerde ýá­ki­let­ti organdardyń tıimdi jumysyn qam­ta­masyz etetin jumys toby quryldy.

«Ulttyq komıssııanyń azamattyq qoǵam qurylymdarymen syndarly dıalogi belgilendi. Búgingi tańda otba­sylyq-genderlik problemamen aınalysatyn 500-ge jýyq ÚEU ju­mys isteıdi. Azamattyq sektormen bir­lesip jumys isteýde turmystyq zorlyq-zombylyqtyń aldyn alý máseleleri erekshe ózekti bolyp otyr. Bul baǵytta «Otbasynda – zorlyq-zombylyqsyz Qazaqstan» jobasy júzege asyrylýda. Qazaqstan – ishki ister organdary júıesinde áıelderdi zorlyq-zombylyqtan qorǵaý jónin­de­gi bólimsheler qurylǵan post­keńestik elderdiń biri. Áıelderge qarsy jasalǵan zorlyq-zombylyq qylmystaryn eń tájirıbeli áıel tergeýshiler zertteıdi. Mundaı tá­jirı­be qylmystardy tezirek jáne tıimdi ashýǵa yqpal etedi», dedi L.Súleımen.

Sonymen qatar ulttyq komıssııa «Mereıli otbasy» ulttyq baıqaýyn, ákelerdiń respýblıkalyq forýmyn, aýyldaǵy áıelderdiń respýblıkalyq forýmyn ótkizdi. Áıelder men qyz­dar­dyń basqarýshylyq áleýeti men saıası mádenıetin damytý maq­sa­tyn­da «Tomırıs» jobasy iske asyrylyp jatyr.

«Qazaqstannyń damýynyń jańa keze­ńindegi otbasylyq-demogra­fııa­lyq jáne genderlik saıasat» taqy­ry­byn­daǵy halyqaralyq ǵylymı konferensııa Qazaqstan, Chehııa, Shveısarııa, Úndistan jáne AQSh ǵalymdary men sarapshylaryn, sondaı-aq Parlament depýtattaryn, ortalyq jáne jergilikti at­­qa­rýshy organdar, ÚEU jáne ha­lyq­aralyq uıymdar ókil­de­rin, jalpy 300-ge jýyq qa­ty­sý­shynyń ba­syn qosty. Kon­fe­rensııa qory­tyn­dysy boıynsha Úkimet pen jer­gilikti atqarýshy organdardyń qury­lymdary paıdalanatyn ǵylymı ne­­giz­delgen saraptamalyq taldaý ázir­­­lendi.

Bıyl júrgizilgen jumystardyń nátıjesinde Qazaqstan Dúnıejúzilik ekonomıkalyq forýmnyń genderlik teńdik boıynsha kórsetkishterin jaq­sart­ty, dálirek aıtqanda, 80-orynnan (2021 jyl) bıyl 65-orynǵa deıin kóterildi.