Ortalyq Azııa Medıa forýmy aıasynda Pýlıtser syılyǵynyń laýreaty, «Associated Press» agenttiginiń burynǵy fotojýrnalısi Lıý Hen Shıng BAQ ókilderine sheberlik saǵatyn ótkizdi. Sheberlik saǵatyna jýrnalıstermen birge Aqparat jáne qoǵamdyq damý mınıstri Darhan Qydyráli qatysty.
«Elimizde medıa salasyndaǵy eń mártebeli Pýlıtser syılyǵyn alǵan jýrnalıst joq. Biraq osy syılyqqa bizdiń BAQ ókilderi bolashaqta ıe bolady degen úmit bar. Osyǵan oraı Ortalyq Azııada uıymdastyrylǵan alǵashqy medıa forýmǵa Lıý Hen Shıng myrzany shaqyrǵan bolatynbyz. Shaqyrtýymyzdy qabyl alǵan Lıý myrzaǵa alǵysymdy bildiremin», dedi Aqparat jáne qoǵamdyq damý mınıstri Darhan Qydyráli.
Lıý Hen Shıng Gonkongta dúnıege kelgen. Onyń sýretke túsirý áýestigi Nıý-Iork qalalyq ýnıversıtetiniń Hanter kolledjinde oqyp júrgen kezinde bastalǵan. Lıý kolledjge 1969 jyly Gonkongtaǵy mektepti bitirgen soń túsken. «Nıý-Iorkte túrli festıvalge qatysyp, olardyń bárin taspaǵa túsirdim, meniń mádenıetim osy qalada qalyptasty», dep eske alady AQSh-taǵy ómirin fotojýrnalıst.
Lıý álemge tanymal fotograf Djon Mılıden sabaq alyp, onyń sheberlik mektebinen ótken. Tálimgeri sýretke túsirgende jaryq pen kompozısııany sáıkestendirip taspalaýǵa erekshe mańyz berip, Lıý Hen Shıng osy tehnıkany meńgerýge umtylǵan. Osy ádis boıynsha ol 1991 jyly Mıhaıl Gorbachevtiń qol qoıý sátin obektıvke túsirgen. Bul sýret onyń eń tanymal ári baǵaly jumysyna aınalǵan.
1976 jyly anasy qaıtys bolǵan soń Lıý týǵan eline oralady. Fotojýrnalıst retinde ol Qytaıda qalyptasyp, osy mamandyqtyń uńǵyl-shuńǵylyn sheberlikpen meńgeredi. Tájirıbe jınaqtaǵan soń «Associated Press» agenttiginiń fototilshisi bolady. Ol kóptegen eldi aralap, saıası tulǵalardy taspaǵa túsiredi.
«Men Úndistan, Aýǵanstan, Pákistanda boldym. Shrı-Lankadaǵy qaqtyǵysty sýretke túsirdim. 1989 jyly «Associated Press» basshylyǵy: «Máskeýge barasyń ba?» dep surady. Árıne, kelistim. О́ıtkeni meni keńes ókimetiniń keńistigi qatty qyzyqtyratyn. Sóıtip keńes odaǵymen keńirek tanysýǵa múmkindik aldym», deıdi Lıý Hen Shıng.
Keńes odaǵy ydyraǵan soń Máskeýge kelgen Lıý Reseıdiń sol kezdegi tirshiligin qaz-qalpynda kadrlarǵa toǵystyryp, taspaǵa tartady. Keıin 1992 jyly osy fotosýretteri úshin ol jýrnalıstıkadaǵy eń bedeldi syılyq Pýlıserdi ıelenedi. Fotojýrnalıstke osy saladaǵy tanymal syılyq Reseıde jasaǵan jumystary úshin berilgen.
Sheberlik saǵatynda Lıý Hen Shıng resmı is-sharany, sheneýnikti qalaı sýretke túsirý qajet, qandaı detal qamtylýy qajet ekenin aıtyp, tájirıbesimen bólisti.
«Resmı tulǵalar men resmı jıyndy taspaǵa túsirgen kezde jaryqqa basa mán berý qajet. Odan adamnyń túr-tulǵasy, sol kezdegi kóńil-kúıi naqty kórinedi. Eger jaryq durys paıdalanylmaı, «obekti» durys jaǵynan nysanaǵa alynbasa, jaǵymsyz bolmysty adam sekildi kórinip qalýy múmkin. О́ıtkeni fotosýretten adamnyń bolmysy aıqyn kórinedi. Resmı tulǵa sýret arqyly da halyqqa jaǵymdy sıpatta kórinedi. Onyń shynaıylyǵyn dál kórsetý kerek. Osy sheberlikti meńgerseńizder, áserli týyndy shyǵary sózsiz», deıdi 71 jastaǵy fotograf.
Qazir fotojýrnalıst Lıý Hen Shıng Shanhaı qalasynda turady. Qaladaǵy Fotografııa ortalyǵynda onyń jeke gallereıasy bar. Jıyn sońynda Aqparat jáne qoǵamdyq damý mınıstri Darhan Qydyráli Lıý Hen Shıngke estelikke syılyq tabystady.