Mańdaıǵa basqan zııalylarymyzdyń jalǵasy, Táýelsizdik jyldardaǵy ult joqshysy Amangeldi Aıtaly baqıǵa ozdy.
Týǵan eliniń sátti qadamyna súıinip, jaza basqan jolyna kúıinip, osyny taldap-tarazylaı bilý – azamattyń azamaty kóteretin aýyr da jaýapty júk bolsa, 90-jyldardyń sońynan bastap osy taǵdyr Ábekeńe buıyrypty.
Azat elimizdiń tarıhynda Amangeldi Ábdirahmanuly qasıeti halyqtyń «Parlament depýtaty qandaı bolý kerek?» suraǵyna jaýap sekildi kórinedi. Onyń ár kezeńde eldik minber men baspasózden sóılegen sózi ultymyzdyń bes saýsaqtaı birigip, judyryqtaı jumylǵan qýatty bolýyna baǵyttaldy. Baıypty oıy, parasatty tujyrymy, dáleldi usynysy naǵyz ǵalym ekenin aıqyndap turatyn.
Halyq «aıtary bar Aıtaly» dep shynaıy jaqsy kórdi. Jurttyń muńyn muńdap, joǵyn joqtaǵan rııasyz tulǵany el de jazbaı tanıdy ǵoı. Azamattyq qoǵamnyń bastaýynda turǵan Amangeldi Aıtaly eńbegine saıasattanýshy qaýym búgin de, keıin de ádil baǵa beredi dep oılaımyz. Eń bastysy, ol halyq múddesimen ómir súrdi...
Ábekeń «Egemen Qazaqstan» gazetimen tyǵyz baılanys ornatyp, qoǵamnyń kúrdeli máseleleriniń astaryna boılap, sanaǵa sáýle túsiretin maqala joldap otyratyn. Keshegi «Qańtar qasireti» kezinde de azamattyq oıyn oqyrmanǵa alǵaýsyz jetkizdi. Álemdi dúrbeleńge salǵan qyrǵı qabaq kıkiljińniń sebep-saldary men sabaǵyn taldaǵan maqalasyn osydan bir apta ǵana buryn jarııalaǵan edik. Bul BAQ-ta basylǵan ǵalymnyń sońǵy ósıetindeı eken-aý... Alla-taǵala tulǵanyń eń aqyrǵy sóziniń de – el amandyǵy bolýyn jazǵan eken.
Ult jolynda aqtyq demi úzilgenshe adal qyzmet etken Amangeldi Aıtaly esimi elimen birge jasaı beredi. Endi ol elshil, bilikti qaıratkerlik qasıettiń balamasyna aınalady. Qazaqtyń baıtaq dalasy marqumdy joqtaı otyryp, elge qyzmet etýdegi Amangeldi Aıtaly ónegesin urpaqqa – jańa býynǵa amanattaıdy.
Baqul bolyńyz, bar qazaqtyń joqshysy!
«Egemen Qazaqstan» qalamgerleri