Búgin Senat Spıkeri Máýlen Áshimbaevtyń tóraǵalyǵymen kezekti Palata otyrysy ótti, dep habarlaıdy Egemen.kz.
Memleket basshysy Qasym-Jomart Toqaev 2022 jylǵy 16 naýryzdaǵy Joldaýynda elimizdiń ınstıtýsıonaldyq negizin nyǵaıtý maqsatynda Parlamenttiń rólin aıtarlyqtaı arttyrý mindetin júktegeni belgili. Soǵan baılanysty Konstıtýsııaǵa jáne Parlamenttiń jalpy reglamentine ózgerister engizildi. Osyǵan oraı Palata otyrysynyń kún tártibinde Senat reglamentine tıisti tolyqtyrýlar engizý máselesi qaraldy.
Senatorlar «Aglomerasııalardy damytý týraly» jáne «Qazaqstan Respýblıkasynyń keıbir zańnamalyq aktilerine aglomerasııalardy damytý máseleleri boıynsha ózgerister men tolyqtyrýlar engizý týraly» zańdardy qarap, qabyldady. Atalǵan zańdar aglomerasııalardy qalyptastyrý jáne damytý úshin qajetti quqyqtyq, ınstıtýsıonaldyq orta qalyptastyrýǵa arnalǵan.
«Osy zań arqyly eldi mekenderdi aglomerasııaǵa jatqyzýdyń ólshemsharttary, Úkimettiń, ýákiletti jáne jergilikti organdardyń ókilettikteri bekitiledi. Sondaı-aq bes jyldyq kezeńge ázirlenetin aglomerasııalardy damytýdyń keshendi jospary qabyldanady. Jańa normalar halyqty qonystandyrý jáne óndiristik kúshterdi ornalastyrý júıesin jetildirýge, ınjenerlik, kóliktik, áleýmettik ınfraqurylymdy tıimdi paıdalanýǵa oń áserin tıgizedi. Munyń bári aglomerasııaǵa jatatyn eldi mekenderde ómir súrý deńgeıin jaqsartýǵa yqpal etedi dep senemiz», dedi Máýlen Áshimbaev.
Sondaı-aq senatorlar «О́simdikter dúnıesi týraly» jáne «Qazaqstan Respýblıkasynyń keıbir zańnamalyq aktilerine ósimdikter dúnıesi jáne erekshe qorǵalatyn tabıǵı aýmaqtar máseleleri boıynsha ózgerister men tolyqtyrýlar engizý týraly» zańdardy qabyldady. Atalǵan qujattar ósimdikter dúnıesin qorǵaý, qalpyna keltirý jáne paıdalaný salasyndaǵy qoǵamdyq qatynastardy retteýge baǵyttalǵan.