Astanada qoǵamdyq kóliktiń jumysyn jaqsartý maqsatynda keshendi jáne júıeli jumystar júrgizilýde. Qala ákiminiń orynbasary Nurlan Nurkenov onlaın-brıfıng barysynda qaladaǵy kólik keshenin, jyljymaly quramdy jańartý jáne avtobýstardyń aralyq uzaqtyǵyn qysqartý jaıly aıtyp berdi, dep habarlaıdy Egemen.kz.
Búginde qala turǵyndarynyń jartysynan kóbi qoǵamdyq kólikti paıdalanady.
«2020 jyldyń naýryz aıynan bastap 18 jasqa deıingi balalar tegin jol júrdi. Osy kezeńde oqýshylar 50 mıllıonnan astam sapar jasady. Bir otbasynda birneshe bala bolǵandaǵy qıyndyqty bilemiz. Mundaıda tegin jol júrý óte úlken qoldaý bolmaq, óıtkeni oqýshy tek mektepke ǵana emes, túrli úıirmeler men seksııalarǵa avtobýspen tegin qatynaı alady», dep túsindirdi Nurkenov.
Ol elordanyń barlyq eldi mekeni avtobýs marshrýttarymen qamtylǵanyn atap ótti. Sol sııaqty elordaǵa irgeles aımaqtarǵa sapaly kólik qyzmetin kórsetetin 25 qala mańyndaǵy marshrýt bar.
Elordanyń avtoparkin jańartý boıynsha jumystar belsendi júrip jatyr. Máselen, 2014 jyldan bastap 853 zamanaýı avtobýs satyp alyndy. Qorshaǵan ortanyń lastanýyn azaıtý úshin 2019 jyly 100 elektrobýs satyp alyndy.
«Kólik keshenin únemi jańǵyrtý jumysy júrip jatyr. Máselen bıyl 3 jańa baǵyt iske qosyldy – №43, 121, 327. Qoldanystaǵy marshrýttar qozǵalysynyń 27 shemasyn ońtaılandyrý júrgizildi, 16 birlik marshrýtqa kesteler sany ulǵaıtyldy. Qoǵamdyq kóliktiń júrý ýaqytyn qysqartý úshin uzyndyǵy 4,3 km bolatyn 2 Bus Lane ýchaskesi engizildi, 15 birlik jańa aıaldama pýnkti ornatyldy. Sondaı-aq jeke avtobýs parkteriniń kúshimen 35 jańa avtobýs satyp alyndy», dedi qala ákiminiń orynbasary.
2023 jyly elordanyń avtobýs parkterin 300 kólikke jańartý josparlanyp otyr.
Qazir 300-den astam avtobýsty jańartý jáne tolyqtyrý boıynsha úsh áleýetti ınvestormen jumys júrip jatyr.
Bir ereksheligi, barlyq ınvestor avtobýs parkin qurýdy josparlap otyr jáne atmosferany zııandy shyǵaryndylarmen lastamaı, únemdi ári ekologııalyq taza elektr avtobýstaryn satyp alady. Bul ásirese qalalyq jaǵdaıda mańyzdy.
«Bul sharalar jyljymaly quramnyń qazirgi tapshylyǵyn azaıtýǵa jáne marshrýttaǵy kesteler sanyn kóbeıtýge múmkindik beredi, bul avtobýstardyń júrý aralyǵyn qysqartýǵa ákeledi», dep qorytyndylady spıker.