Qazaqstannyń Damý Banki qańtar aıynan bastap jeńildetilgen avtonesıeler qaıta beriletinin habarlady, dep jazady Egemen.kz.
2023 jyldan bastap Qazaqstanda jeńildikti avtokredıtteý baǵdarlamalarynyń operatorlary «Qazaqstannyń Damý Banki» AQ jáne «О́nerkásipti damytý qory» AQ barlyq qoldanystaǵy baǵdarlamalar boıynsha sharttar birizdendiriletinin málimdedi.
«Qazir baǵdarlamalarǵa qatysatyn ekinshi deńgeıli bankter qoldanystaǵy kredıtterdi óteýden túsetin tólemderdi jınaqtaý prosesin júzege asyryp jatyr. Revolverlik tetik negizinde jeńildikti qaryzdar berýdi bastaý 2023 jylǵy qańtardyń ekinshi jartysynda kútiledi. Iske qosý kúnine eki baǵdarlama boıynsha jınaqtalǵan qarajat kólemi shamamen 13 mlrd teńgeni quraıdy, bul keminde 1300 jańa avtokredıt berýge múmkindik beredi. Bolashaqta revolverlik ádispen jınaqtalǵan qarajatty bólýdi aı saıyn iske asyrý josparlanǵan», delingen QDB habarlamasynda.
Eske sala ketsek, 2015 jyldan bastap QDB arqyly jeńildikti avtonesıeleý baǵdarlamasyna 82 mlrd teńge bólingen. Revolverlik tetikti paıdalanýdyń arqasynda bul qarajat esebinen jalpy somasy 176 mlrd teńgege 32 myńnan astam qaryz berildi. Al О́nerkásipti damytý qory 2022 jyldyń mamyr aıynda jeńildetilgen avtonesıeleý baǵdarlamasyna 100 mlrd teńge bólgen. 2022 jylǵy 1 jeltoqsandaǵy jaǵdaı boıynsha bul qarajatqa 14 myńnan astam nesıe maquldandy, onyń ishinde 12,5 myńnan astam jańa kólik berildi. Osylaısha, avtonesıeniń ortasha mólsheri 7,8 mln teńgeni qurady.
Bul rette baǵdarlamalarǵa Halyk Bank, ForteBank, Bank SentrKredıt jáne Eýrazııalyq Bank qatysady.