Bul jóninde Premer-mınıstrdiń orynbasary – saýda jáne ıntegrasııa mınıstri Serik Jumanǵarın 22 jeltoqsanda Islamabadta ótken Qazaqstan Respýblıkasy men Pákistan Islam Respýblıkasy arasyndaǵy saýda-ekonomıkalyq, ǵylymı, tehnıkalyq jáne mádenı yntymaqtastyq jónindegi úkimetaralyq komıssııanyń 11-shi otyrysy barysynda málimdedi, dep habarlaıdy Egemen.kz.
«Búginde Qazaqstan - Pákistan yntymaqtastyǵynyń damý áleýeti zor. Qazaqstan Pákistandy Ońtústik Azııadaǵy mańyzdy jáne perspektıvti saýda seriktesi retinde qarastyrady. Bizdiń kásipkerler otandyq ónimdi Pákistan naryǵyna, atap aıtqanda, dándi jáne burshaqty daqyldar, ósimdik maıy, makaron, un jáne kondıterlik ónimderdi eksporttaýǵa, al Qazaqstan óz tarapynan jemis-kókónis ónimderin ımporttaýǵa múddeli. Bolashaqta bizdiń el Pákistan naryǵyna $411 mln astam somaǵa ártúrli salalardaǵy óńdelgen taýarlardyń 80-ge jýyq túrin jetkizýge daıyn», dedi Serik Jumanǵarın kirispe sózinde.
Otyrys barysynda Serik Jumanǵarın eki el yntymaqtastyǵynyń perspektıvti salalaryn atady. Bul – jer qoınaýyn paıdalaný, agroónerkásiptik keshen, jeńil ónerkásip. Sondaı-aq qazaqstandyq tarap qazaqstandyq eksporttaýshylarǵa ońtústik teńiz porttaryna eń qysqa shyǵýdy qamtamasyz etý úshin Ońtústik Azııa naryqtaryna jetkizýdiń kólik-eksporttyq baǵyttaryn ártaraptandyrýǵa múddelilik bildirdi.
Úkimetaralyq komıssııa jumysynyń qorytyndysy boıynsha taraptar 9 qujatqa qol qoıdy:
QR avıasııalyq bıligi men PIR arasyndaǵy ózara túsinistik týraly memorandým; Pendjab Banki men «Bank SentrKredıt» AQ arasyndaǵy ózara túsinistik týraly memorandým; «KAZAKH INVEST» UK» AQ, «QAZTRADE «SSDO» AQ, Pákistannyń saýdany damytý basqarmasy (TDAP) jáne Pákistannyń Investısııalar jónindegi keńesi arasyndaǵy ózara túsinistik týraly memorandým; 2023 jyldyń naýryz-maýsym aılarynda Qazaqstanǵa jıyntyq kólemi 120 myń tonna bolatyn kartop jetkizý týraly alty memorandým.Sondaı-aq qazaqstandyq tarap pákistandyq NBC (National Logistic Cell) logıstıkalyq kompanııasymen kezdesip, Aýǵanstan arqyly avtomobıl tranzıti máselelerin talqylady. Kompanııa tasymaldaýdy saqtandyrýǵa jáne júkterdi Pákistannan Qazaqstanǵa eń qysqa marshrýt boıynsha jetkizýdi qamtamasyz etýge daıyn ekendigin atap ótti.
Úkimetaralyq komıssııa otyrysymen qatar qazaqstandyq jáne pákistandyq bıznestiń B2B kezdesýleri, Birlesken iskerlik keńes ótti. Kezdesýlerdiń qorytyndysy boıynsha «Dala Trans» JShS jáne pákistandyq «Haroon Brothers and co» kólik-logıstıkalyq kompanııasy Pákistannan Qazaqstanǵa taýarlar, sondaı-aq Pákistan aýmaǵy arqyly temirjol kóligimen jáne basqa da neǵurlym tıimdi mýltımodaldy marshrýttarmen memleketter aýmaǵy arqyly tranzıt úshin júk aǵynyn tartýda ózara yntymaqtastyq týraly memorandýmǵa qol qoıdy.
«Dala Trans» JShS kommersııalyq dırektory Nursultan Nájimetdınov te sapar qorytyndylaryna toqtaldy. Ol Pákistannyń qazaqstandyq taýarlardy jetkizýge qyzyǵýshylyq tanytyp otyrǵanyn aıtty.
«Biz elderimizge júkter tranzıti jáne tasymaldaý boıynsha yntymaqtastyq týraly memorandýmǵa qol qoıdyq, qazirgi kezde basqa áleýetti seriktestermen Qostanaıdan Haıratonǵa deıin 2500 tonna un jáne Pákistannan jylyna 50 myń tonnaǵa jýyq kartop tasymaldaý máselesin talqylap jatyrmyz», dedi ol.
«Barys-2007» JShS Bas dırektory, Gramad saýda jelisiniń ıesi, makaron jáne kondıterlik ónimderdi óndirýshi Aıjan Naımbekova Pákistanǵa iskerlik sapary aıasynda kúrish, kondıterlik ónimder jáne býyp-túıý boıynsha jaqsy usynystar aldy.
«Munda kelisimsharttarǵa qol qoıýǵa bolady dep oılaımyn. Ol úshin biz Qazaqstanǵa kelgen soń barlyq usynystar boıynsha shyǵyn bóligin eseptep, neǵurlym ońtaıly usynystardy tańdaımyz. Pákistanǵa makaron ónimderin jetkizýge bolady. Menińshe, biz ózara tıimdi kelisimderge qol jetkizemiz», dedi Aıjan Naımbekova.