Memleket basshysy Qasym-Jomart Toqaev Parlament Senatynyń otyrysyna qatysty, dep habarlaıdy Egemen.kz Aqordaǵa silteme jasap.
Qasym-Jomart Toqaev adam quqyǵyn qorǵaý salasyna árdaıym aıryqsha mán beretinine toqtalyp, sońǵy jyldary bul baǵytta aıtarlyqtaı ilgerileý bar ekenin aıtty. «О́lim jazasyna birjola tyıym saldyq. Turmystyq zorlyq-zombylyq jasaǵan adamdarǵa jaza qataıdy. Sot reformasy júzege asyrylyp jatyr. Zań ústemdigi jáne qazylardyń derbes ári ádil bolýy – basty nazarda. Taǵy da qaıtalap aıtamyn: ádildik pen zańdylyqty qamtamasyz etý – memlekettiń mindeti. Qoǵam bizden osyny kútip otyr. Sondyqtan bıyl adam quqyǵyn qorǵaý júıesin jetildirý jumysy jalǵasty. Adam quqyqtary jónindegi ýákilge konstıtýsııalyq kepildik jáne ımmýnıtet berildi. Bas prokýrordyń quqyq qorǵaý quzyreti kúsheıtildi. Konstıtýsııalyq Sottyń qurylýy asa mańyzdy qadam boldy. Bul organ jańa jyldan bastap jumysqa kirisedi. Ol Ata zań normalarynyń qatań saqtalýyn qamtamasyz etedi. Konstıtýsııalyq Sot azamattardyń quqyqtary men bostandyqtaryn qorǵaý isine zor úles qosady dep senemin», dedi Memleket basshysy otyrys barysynda.
Prezıdenttiń aıtýynsha, Konstıtýsııalyq Sottyń kadrlyq quramyn jasaqtaý kezinde sabaqtastyq saqtalýǵa tıis. Ol jańa organnyń tóraǵasyna aıryqsha ári jaýapty mindet júkteletinine nazar aýdardy. Bul rette Memleket basshysy osy jaýapty qyzmetke Elvıra Ábilhasymqyzy Azımovany usyndy.
«Elvıra Ábilhasymqyzy – tájirıbeli, bilikti maman. Zań shyǵarý jumysyn, halyqaralyq quqyq salasyn óte jaqsy biledi. Ol 20 jyldan astam ýaqyt Ádilet mınıstrliginde eńbek etti. Qatardaǵy qyzmetkerden mınıstrdiń orynbasary laýazymyna deıin kóterildi. 2019 jyldan beri Adam quqyqtary jónindegi ýákil qyzmetin atqaryp keledi. Sizderden Elvıra Ábilhasymqyzy Azımovany Adam quqyqtary jónindegi ýákil laýazymynan bosatyp, Konstıtýsııalyq sottyń tóraǵasy laýazymyna taǵaıyndaýǵa kelisim berýdi suraımyn», dedi Memleket basshysy. Senat depýtattary ashyq daýys berý arqyly Elvıra Ábilhasymqyzy Azımovanyń kandıdatýrasyn biraýyzdan qoldady.