Jalpyǵa birdeı deklarasııalaý aıasynda salyq deklarasııasyn tapsyrý úshin jańa fýnksıonal iske qosyldy. Bul týraly Egemen.kz Memlekttik kirister komıtetiniń baspasóz qyzmetine silteme jasap habarlaıdy.
«Elektrondyq úkimet» portalynda (E-gov.kz) «Keden jáne salyqtar», «Salyq salý» bóliminde kirister men múlik týraly deklarasııany (270.00-nysan) elektrondy túrde usyný boıynsha fýnksıonal iske qosyldy.
Salyq kodeksiniń 633-babyna sáıkes kirister men múlik týraly deklarasııany (270.00-nysan) Salyq kodeksiniń 630-babynyń 1-tarmaǵynda atalǵan jeke tulǵalar jyl saıyn usynady. Aktıvter men mindettemeler týraly deklarasııa (250.00-nysan) usynylatyn jyldan keıingi jyldan bastap esepti salyqtyq kezeńniń 31 jeltoqsanyndaǵy jaǵdaı boıynsha ótkiziledi.
Bıyl atalǵan deklarasııany 2021 jyly, ıaǵnı birinshi kezeńde, deklarasııalaý júıesine kirgen tulǵalar tapsyrady.
Eske sala keteıik, deklarasııany tapsyrý merzimi:
15 shildege deıin – qaǵaz túrinde
15 qyrkúıekke deıin – elektrondy túrde
Deklarasııany elektrondy túrde «Salyq tóleýshiniń kabıneti» (kgd.gov.kz) jáne «e-Salyq Azamat» mobıldi qosymshasy arqyly da tapsyrýǵa bolady.
Aktıvter men mindettemeler týraly deklarasııany (250.00-nysan) da E-gov.kz portaly arqyly tapsyrýǵa bolady. Ony bıyl memlekettik mekemeler men kvazımemlekettik sektor uıymdarynyń qyzmetkerleri men olardyń jubaılary usynýy qajet.