Búgin «О́skemen - Taýly Úlbi - Severnoe» (Glýbokoe aýdanynyń 31 km) oblystyq mańyzy bar avtojol ýchaskesinde jalpy kólemi 600 m tekshe metr qar kóshkini ózdiginen tústi, dep habarlaıdy Egemen.kz.
«Qazseldenqorǵaý» MM málimetinshe, jol aldyn ala jabyq bolatyn. Qazirgi ýaqytta ýchaskeni jol qyzmetteriniń tehnıkasy tazartyp jatyr. Jol ýaqytsha jabyq kúıinde qalady.
ShQO TJD birneshe kún boıy qatty jel men qardyń jaýýyna baılanysty kóshkin qaýpi týraly eskertken.
Sonymen qatar búgin «О́skemen-Altaı» ýchaskesinde kóshkinderdi májbúrlep túsirý júrgizildi.
«Betkeılerden qar massalaryn baqylanatyn túsirý jumystary júrgizile bastady. Aldyn alý is-sharalaryn júrgize otyryp, biz jaǵdaıdy turaqtandyramyz jáne sol arqyly turǵyndar men avtojoldar ýchaskeleri arqyly ótetin kólikterdiń qaýipsizdigin qamtamasyz etemiz. Nátıjesinde ýchaskede 4 ret qar túsirildi, barlyǵy 8200 tekshe metr qar tústi. Aldaǵy kúnderi bul profılaktıkalyq jumys jalǵasady», dedi «Qazseldenqorǵaý» ShQ fılıalynyń basshysy Omar Dúzgimbaev.
ShQO TJD óńirde qar kóshkini qaýpiniń saqtalatynyn habarlaıdy. Turǵyndar qutqarýshylardyń usynymdaryna nemquraıdy karamaýǵa jáne taýly jerlerge, kóshkin qaýpi bar ýchaskelerge barmaýǵa tıis. Tótenshe jaǵdaı kezinde 112 nómiri boıynsha habarlaý qajet.