Qazaq ǵylymy memlekettik qoldaýdy qajet etedi. Bul týraly Ǵylym jáne joǵary bilim mınıstrligi alqasynyń keńeıtilgen otyrysynda Premer-mınıstrdiń orynbasary Altaı Kólginov aıtty, dep habarlaıdy Egemen.kz.
«Bizdiń ǵylymı qaýymdastyq, joǵary oqý oryndarynyń rektorlary, joǵary oqý oryndarynyń tarapynan úlken jumystar atqarylyp jatyr. Sheshiletin josparlardy talqyladyq. Atap aıtqanda sıfrlandyrý máseleleri, ustazdarymyzdyń biliktiligin arttyrý, bolashaqta kadr qajettiligin durys boljaý, bizge qajet jańa mamandyqtar talqylandy. Biz básekege qabiletti bolý úshin kóp jumys isteýimiz kerek. Ol úshin jaǵdaı jasaýymyz kerek. Memleket basshysynyń naqty tapsyrmalary ǵylymdy damytýǵa baǵyttalǵan. Ǵylymǵa memlekettik qoldaý qajet», dedi Altaı Kólginov.
Vıse-premerdiń aıtýynsha, eń mańyzdy mindet – qazaqstandyqtardy ǵylymǵa kóbirek baýlý.
«Búginde memleketten qarajat bólinip, ǵylymı-zertteý ınstıtýttary qyzmetkerleriniń jalaqysy kóterilip, ǵylymı zertteýlerge, startap jobalarǵa granttar bólinip jatyr. Biz bıznes pen ǵylymnyń úılesimdi jumys istegenin qalaımyz», dep qosty Kólginov.
Vıse-premerdiń aıtýynsha, kelesi mańyzdy másele - jastarǵa zamanaýı bilim berý.
«Ýnıversıtetter zamanaýı zerthanalarmen, jańartylǵan kitaphanalarmen qamtamasyz etilip, oqytýshylardyń biliktiligin únemi arttyryp otyrý mańyzdy. Osy maqsatta 20 joǵary oqý ornynyń bazasynda akademııalyq sheberlik ortalyqtaryn qurý boıynsha muqııat jumys júrgizý qajet. Bul jumystar 2021 jyly bastalǵanymen, áli de naqty nátıje kóre almaı otyrmyz. О́ıtkeni mınıstrlik JOO-men daıyndyq jumystaryn der kezinde júrgizbegen. Biz ony jaqsartýymyz kerek», dedi vıse-premer.