Eńbek jáne halyqty áleýmettik qorǵaý mınıstrligi baspasóz qyzmetiniń habarlaýynsha, 2023 jylǵy 1 qańtardan bastap Qazaqstanda zeınetaqy men járdemaqylardyń barlyq túriniń mólsheri ósti. Bul 4,4 mln zeınetaqy men járdemaqy alýshyǵa áser etedi. Osy maqsattarǵa respýblıkalyq bıýdjette 4,6 trln teńge qarastyrylǵan.
Bazalyq zeınetaqynyń mólsheri eń tómengi kúnkóris deńgeıiniń jyl saıynǵy ulǵaıýyn eskere otyryp, sondaı-aq Memleket basshysynyń tapsyrmasyna sáıkes onyń eń tómengi mólsheri eń tómengi kúnkóris deńgeıiniń 54%-dan 60%-ǵa deıin ulǵaıýyna baılanysty artty.
Yntymaqty zeınetaqy mólsheri ınflıasııa deńgeıinen 2%-ǵa kóterildi. Budan basqa, Memleket basshysynyń tapsyrmasyna sáıkes yntymaqty zeınetaqyny esepteý úshin paıdalanylatyn eń joǵary tabys mólsheri 46-dan 55 AEK-ke deıin (158,7-den 189,8 myń teńgege deıin) ulǵaıtyldy.
Nátıjesinde, bıýdjetten tólenetin zeınetaqy tólemderiniń eń tómengi mólsheri 68,2 myń teńgeden 77,4 myń teńgege deıin ósti. Zeınetaqynyń ósýi barlyq 2,2 mln zeınetkerge áser etti.
Eń tómengi kúnkóris deńgeıiniń ulǵaıýyna baılanysty múgedektik jáne asyraýshysynan aıyrylǵan jaǵdaıda tólenetin járdemaqylardyń mólsheri de artty.
Aılyq eseptik kórsetkish (budan ári – AEK) mólsheriniń ulǵaıýyna baılanysty taǵy da birqatar járdemaqynyń mólsheri ósti.
Máselen, jumys isteıtin de, jumys istemeıtin de áıelderge bala týýǵa baılanysty tólenetin memlekettik qoldaýdyń mólsheri endi: birinshi, ekinshi jáne úshinshi balaǵa 38 AEK nemese 131 100 teńge (2022 jyly – 120 840 teńge), tórtinshi jáne odan da kóp balaǵa – 63 AEK nemese 217 350 teńgeni (2022 jyly – 200 340 teńge) quraıdy.
Respýblıkalyq bıýdjetten jumys istemeıtin ata-analarǵa bala kútimi boıynsha járdemaqy taǵaıyndalady, onyń mólsheri AEK ósýin eskere otyryp, bıyldan bastap 8,5%-ǵa ósti.
Jumys isteıtin ata-analar bala kútimi boıynsha áleýmettik tólemderdi Memlekettik áleýmettik saqtandyrý qorynan alady. 2023 jyldan bastap Prezıdent tapsyrmasymen bala kútimi boıynsha tólem merzimi bir jyldan bir jarym jylǵa deıin uzardy.